Pas rizgjedhjes së tij në krye të Real Madridit, Florentino Perez pritet të nisë menjëherë ofensivën në tregun e transferimeve me një ofertë rekord prej 150 milionë eurosh për një futbollist të nivelit më të lartë. Sipas raportimeve të mediave spanjolle, objektivi kryesor i madrilenëve është sulmuesi francez i Bayern Munich, Michael Olise.

Perez kishte paralajmëruar gjatë fushatës zgjedhore se do të bënte ofertën më të madhe në historinë e klubit për një lojtar nga një ekip i madh i Ligës së Kampionëve. Edhe pse nuk e përmendi emrin, burime të ndryshme mediatike kanë raportuar se bëhet fjalë për Olise, i cili ka shkëlqyer me fanellën e Bayernit.

Transferimi i mundshëm i Olise pritet të jetë një nga sagat më të mëdha të afatit kalimtar veror, ndërsa Real Madridi synon të rikthejë politikën e “galaktikëve” pas një sezoni pa trofe madhorë.