Interesimi i jashtëzakonshëm për Kombëtaren e Norvegjisë në futboll ka bërë që fanellat zyrtare të ekipit të shiten plotësisht në Evropë, vetëm pak ditë para çerekfinales së Kupës së Botës kundër Anglisë.

Federata Norvegjeze e Futbollit ka pranuar se ka nënvlerësuar ndjeshëm kërkesën për fanellat, të cilat kanë qenë vazhdimisht jashtë stokut në Nike dhe te shitësit e tjerë zyrtarë që nga lansimi i tyre në muajin mars.

Sipas drejtorit komercial, Runar Pahr Andresen, kërkesa nga tifozët ka tejkaluar të gjitha parashikimet.

“Kërkesa nga tifozët është shumë përtej parashikimeve tona. Porositë këtë vit janë në nivele rekord”, deklaroi Andresen.

Ai bëri të ditur se këtë vit shitësit kanë porositur rreth 250 mijë fanella, krahasuar me rreth 50 mijë në të njëjtën periudhë të vitit të kaluar.

Interesimi është rritur ndjeshëm pas paraqitjeve mbresëlënëse të Norvegjisë në Botëror dhe popullaritetit të yjeve si Erling Haaland, ndërsa fitorja ndaj Brazilit ka shtuar edhe më shumë entuziazmin e tifozëve.

Dyqani sportiv Torshov Sport në Oslo pranoi një ngarkesë të re fanellash të martën, duke bërë që qindra tifozë të formonin radhë të gjata para hapjes së dyqanit. Mediat lokale raportuan se radha ishte rreth 600 metra e gjatë, ndërsa disa tifozë pritën deri në 12 orë, të pajisur edhe me karrige.

Menaxheri i dyqanit, Anders Lilleberg, tha se nuk kishte parë kurrë një atmosferë të tillë.

“Kam shumë vite që punoj këtu, por nuk kam përjetuar kurrë një atmosferë si kjo. Është absolutisht e jashtëzakonshme”, u shpreh ai.

Dyqani tashmë u ka kërkuar tifozëve të regjistrohen për dërgesën e ardhshme të fanellave, megjithëse nuk mund të garantojë se ato do të mbërrijnë para ndeshjes së së shtunës.

Nga ana tjetër, Andresen theksoi se prodhimi i fanellave planifikohet shumë kohë përpara dhe nuk mund të rritet menjëherë gjatë turneut.

“Do të donim të kishim më shumë fanella në dispozicion, por prodhimi planifikohet shumë kohë më parë. Është sfiduese të rritet ndjeshëm prodhimi gjatë zhvillimit të një Kupe Bote”, tha ai.

Në një deklaratë Andresen shtoi se federata nuk ka realizuar kurrë më parë të ardhura kaq të mëdha nga shitja e fanellave.

Edhe kompania Nike pranoi mungesën e stokut, duke u shprehur se e kupton zhgënjimin e tifozëve.

“Ne e njohim zhgënjimin e tifozëve dhe po punojmë për të përmirësuar disponueshmërinë. Dërgesa të reja të fanellave ‘Norway Home Match’ dhe ‘Stadium’ pritet të mbërrijnë në Norvegji në ditët në vijim, ndërsa më pas do të ketë furnizim më të gjerë”, tha një zëdhënës i kompanisë.

Ndërkohë, mungesa e fanellave ka nxitur edhe rritjen e çmimeve në tregun e rishitjes. Fanella zyrtare “Nike Norway 2026 Stadium Home Jersey”, e cila shitej fillimisht për 89.99 paund, tani po ofrohet deri në 355 paund, ndërsa fanella mysafire po shitet për mbi 230 paund, pa përfshirë taksat dhe shpenzimet e transportit.

Norvegjia ka siguruar një vend në çerekfinale pas fitoreve ndaj Irakut, Senegalit, Bregut të Fildishtë dhe Brazilit, ndërsa sot do të përballet me Anglinë në stadiumin Hard Rock në Miami.

KosovaPress