Kombëtarja e Kosovës në futbollin e femrave ka mësuar kundërshtarin në fazën “play-off” të kualifikimeve për Kupën e Botës 2027, duke shënuar një moment historik për sportin në vend.

Në shortin e hedhur sot në selinë e UEFA-s, u përcaktua se Dardanet do të përballen me Austrinë në gjysmëfinale të kësaj faze. Ndeshja e parë do të zhvillohet më 9 tetor në stadiumin “Fadil Vokrri” në Prishtinë, ndërsa takimi i kthimit do të luhet më 13 tetor në Austri.

Federata e Futbollit e Kosovës në këtë ceremoni u përfaqësua nga shefja e futbollit të femrave, Valbona Gashi Uka, si dhe trajnerja e Kombëtares A, Xhuli Berisha.

Në rast se arrin të kalojë Austrinë, Kosova në finalen e “play-off”-it do të përballet me fituesin e çiftit Izrael - Zvicër. Ndeshjet finale janë planifikuar të zhvillohen më 1 dhe 5 dhjetor.

Kjo arritje konsiderohet historike për futbollin e femrave në Kosovë, pasi është hera e parë që Kombëtarja arrin në këtë fazë të garës. Dardanet siguruan pjesëmarrjen në “play-off” pasi e përfunduan me sukses ciklin kualifikues në Ligën C, duke u renditur në vendin e parë të grupit.

Përveç kësaj, ato kanë siguruar edhe promovimin në Ligën B për edicionin e ardhshëm, duke dëshmuar rritjen e vazhdueshme të futbollit të femrave në Kosovë.

KosovaPress