Përzgjedhësi i Kombëtares së Kosovës U17, Arbnor Morina, ka vazhduar procesin e gjerë të seleksionimit për futbollistët e gjeneratës 2010.

Ky aksion është pjesë e planit vjetor të Federatës së Futbollit të Kosovës, që synon ndërtimin e një ekipi sa më konkurrues për sfidat e ardhshme ndërkombëtare.

Këto kampe seleksionuese po zhvillohen me qëllim të identifikimit dhe vlerësimit të elementit cilësor. Stafi teknik, nën drejtimin e Morinës, po monitoron nga afër potencialin e lojtarëve që vijnë si nga kampionati vendor, ashtu edhe nga diaspora e pasur e Kosovës.

"Procesi i seleksionimit do të vazhdojë edhe në periudhën në vijim, me synimin që në Kombëtaren U17 të përfshihen lojtarët më premtues të kësaj grupmoshe," bëhet e ditur nga stafi teknik i grumbullimit.

Përmes këtyre filtrave, Kombëtarja U17 synon të krijojë një bazë të shëndoshë dhe të ngritë gradualisht nivelin e futbollit të moshave, duke u siguruar talenteve të rinj një urë kalimi drejt skuadrave zinxhirë të Kosovës.

KosovaPress