Në Kosovë është mbajtur për herë të parë Turneu Diplomatik i Padelit, një aktivitet që ka bashkuar përfaqësues të ambasadave, institucioneve vendore dhe komunitetit sportiv. Ky organizim i Federatës të Padelit të Kosovës, në bashkëpunim me Ambasadën e Malit të Zi, u zhvillua në kuadër të shënimit të 20-vjetorit të pavarësisë së Malit të Zi.

Turneu u vlerësua si një hap i rëndësishëm në fuqizimin e diplomacisë sportive dhe në promovimin e padelit si një sport në rritje në vend, raporton KosovaPress.

Kryetari i Federatës së Padelit në Kosovë, Besim Shulemaja theksoi se ky aktivitet shndërrohet në një urë lidhëse mes komuniteteve dhe vendeve, duke kontribuar në imazhin pozitiv dhe përparimin e sportit në nivel ndërkombëtar.

“Shanset janë shumë të mira për me mund me e apliku sportin edhe për me mund, domethënë, me u jep shans të tjerëve me e shikuar se si po rritet sporti në Prishtinë edhe në Kosovë, edhe me ambasadat e tjera. Për shkak se të gjithë këta e dinë se çka është padel-i dhe se punimi bashkë me ambasadat, domethënë për projekte të ardhshme, është shumë i rëndësishëm për sportin. Ky turne, domethënë, është një hap shumë i mirë dhe i suksesshëm për neve” – tha Besim Shulemaja.

Ndërkohë, Ambasadori i Malit të Zi në Kosovë, Bernard Çobaj, vlerësoi nidikimin e bashkëpunimit me institucionet e Kosovës.

“Padyshim që bashkëpunimet e tilla forcojnë dhe thellojnë marrëdhëniet tona bilaterale, por po ashtu edhe promovojnë sportin si një segment të rëndësishëm të zhvillimit të Rajonit në tërësi” – theksoi Bernard Çobaj.

Në këtë aktivitet morën pjesë edhe diplomatë të shumtë, të cilët vlerësuan lart organizimin dhe rolin e sportit në afrimin e njerëzve.

Nga ana tjetër, Jonathan Hargreaves, ambasador i Mbretërisë së Bashkuar në Kosovë, e cilësoi padelin si një sport fantastik dhe shumë social.

“Çdokush mund ta luajë, është shumë social, është shumë i lehtë për t’u filluar. Është vështirë të përmirësohesh dhe të bëhesh shumë i mirë. Unë mendoj se është një mënyrë e mirë për mua që të mbajë trupin në formë, të takoj njerëz, të argëtohem dhe të jem pjesë e kësaj lëvizjeje në rritje në Kosovë, që është lëvizja padel” – theksoi ambasadori Jonathan Hargreaves.

Ndërsa, shefi i Programit të Kombeve të Bashkuara për Zhvillim, në Kosovë, Nuno Queiros, theksoi rëndësinë e aktiviteteve të tilla për bashkimin e njerëzve.

“Është një mënyrë fantastike për të bërë bashkë shumë vende dhe shumë miq. Ne shpesh kryqëzohemi në fusha të ndryshme, por të jemi në gjendje të jemi këtu e ta shijojmë këtë moment, të argëtohemi, sepse në fund të fundit, siç tha edhe ambasadori, gjithçka është të argëtohemi dhe të vrapojmë pak. Është një ide fantastike dhe e falënderojmë Ambasadorin e Malit të Zi që e ka organizuar këtë me Federatën. Shpresojmë që çdokush po e shijon këtë dhe në fund, që ekipi më i mirë të fitojë ose jo" - tha Nuno Queiros.

Po ashtu, edhe Ambasadori i Italisë në Kosovë, Maurizio Antonini u shpreh i kënaqur me pjesëmarrjen, duke theksuar rëndësinë e sportit për një jetë të shëndetshme dhe integrim social.

“Ky është një event i mrekullueshëm. Është turneu i parë ku marr pjesë që kur kam ardhur në Kosovë një vit më parë. Siç thonë latinët, "mendje e shëndoshë në trup të shëndoshë” kjo është ajo që përfiton kur merresh me sport. Sporti është shumë i rëndësishëm dhe jam vërtet i lumtur që i jam bashkuar këtij eventi” – deklaroi Maurizio Antonini.

Përveç këtij turneu, pas dy javësh do të zhvillohet dhe turneu i parë ndërkombëtar i padelit në Kosovë, me mbi 100-150 lojtarë nga 10-15 shtete.

KosovaPress