Presidenti i Shteteve të Bashkuara, Donald Trump e ka vlerësuar rolin e Kosovës në përfundimin  e luftërave, dhe këtë e ka bërë në letrën e falënderimit dërguar ish-presidentes Vjosa Osmani, me rastin e përfundimit të mandatit të saj.

Në letrën që mban datën 8 prill, e të cilën Osmani e ka publikuar sot (e martë), Trump ka nënvizuar se Kosova ka luajtur një rol të rëndësishëm në nismat për paqe dhe stabilitet.

“Kemi arritur shumë së bashku në një periudhë të shkurtër kohore - veçanërisht bashkëpunimin tonë në kuadër të Bordit të Paqes. Pjesëmarrja e Kosovës në këtë nismë të re premtuese do të luajë një rol të jashtëzakonshëm në përfundimin e konflikteve në mbarë botën, duke promovuar njëkohësisht lirinë dhe mirëqenien për të dy popujt tanë”, thuhet në letër.

Përmes kësaj letre, Trump ka vlerësuar edhe rolin e ish-presidentes Osmani, duke e cilësuar si të guximshëm dhe vendimtar në shërbim të qytetarëve të Kosovës.

Me këtë rast, ajo ka thënë se mirëpret vazhdimin e bashkëpunimit në vitet në vijim.

“Falënderoj presidentin Trump për letrën e dërguar në përfundim të mandatit tim, të cilën e pranova mbrëmë, si dhe për vlerësimin që i ka bërë punës sonë! Ashtu siç thekson edhe Presidenti i SHBA-ve në këtë letër, mirëpresim vazhdimin e bashkëpunimit në vitet në vijim”, ka shkruar Osmani në Facebook.

Trump e ka falënderuar Osmanin për bashkëpunimin e ngushtë gjatë periudhës së mandatit, duke vënë në theks përfshirjen e Kosovës për përfundimin e konflikteve dhe promovimin e lirisë dhe mirëqenies.

/Kosovapress/