Tre burra, anëtarë të një familjeje në Graçanicë, janë përleshur mes vete derisa ka ndërhyrë policia për ndarjen e tyre.

Sipas forcave të rendit, tre të dyshuarit e rastit që ndodhi mesditën e së enjtes janë intervistuar dhe janë liruar në procedurë të rregullt.
Ndërkohë, më e dhunshme po del të ketë qenë një grua e cila u dërgua në mbajtje pasi që e kishte sulmuar fizikisht një grua tjetër.

Viktima e rastit  që ndodhi në Prishtinë, ka pranuar tretman mjekësor.

Krahas këtyre dy rasteve në rajonin e Prishtinës, në dosjen e dhunës në familje, policia i ka regjistruar edhe 3 incidente të tjera në raportin 24 orësh për tërë vendin.
Në Mitrovicë, një mashkull është dërguar në mbajtje pasi që kishte sulmuar fizikisht viktimën femër, e cila për pasojë ka pranuar tretman mjekësor.
Në ngjarje e njëjtë ka ndodhur edhe në Deçan, me ndalimin e një mashkulli, dhe trajtimin mjekësor të viktimës grua.

Ndërsa në Pejë, me vendim të prokurorit janë liruar në procedurë të rregullt hetimore edhe viktima edhe i dyshuari. Bëhet fjalë për rastin ku një grua që ka raportuar se i dyshuari mashkull kosovar në vazhdimësi ka ushtruar dhunë fizike dhe psikike ndaj saj, ndërsa të ejten  edhe ka pranuar një  telefonat kërcënuese nga i njëjti.

/Kosovapress/