---

Ndërsa orët numërojnë mbrapsht drejt vërshëllimës fillestare në "Fadil Vokrri", sheshi "Zahir Pajaziti" është shndërruar në një mozaik ngjyrash dhe emocionesh.

Mes flamujve blu dhe të kuq, tifozët e të dyja kampeve ndajnë të njëjtin mendim: Sonte nuk është thjesht një lojë, është një përballje titanësh.

Për adhuruesit e kombëtares turke që kanë udhëtuar drejt Prishtinës, respekti për "Dardanët" është i dukshëm, por besimi te fitorja mbetet i palëkundur.

"Është një ndeshje shumë e vështirë, Kosova është shumë e rrezikshme me lojtarë si Muriqi, Asllani e Rashica," u shpreh një tifoz turk, i cili parashikon një fitore 2-0 për Turqinë falë klasit të Hakan Calhanoglu dhe Arda Guler

Një tjetër mbështetës turk theksoi lidhjen e ngushtë mes dy vendeve: "Kosova e meriton kualifikimin, jemi vende miqësore. Po të mundesha, do ta merrja Vedat Muriqin në ekipin tonë, e njohim mirë nga koha te Fenerbahçe."

Në mes të turmës, i mbuluar me simbolet kombëtare dhe me një entuziazëm që tejkalon çdo temperaturë, komentatori Engjëll Berbatovci ka përcjellë emocionet e tij të pastra për këtë natë të madhe.

"Spe po e ndij as ftohtin edhe po uroj shumë, besoj fuqimisht që kemi me fitu, 3 me 1 kena me fitu," u shpreh Berbatovci me bindje. "E dimë cilësinë e Turqisë, por e dimë që edhe shpirtin e madh që e kena na.Miliona shqiptarë në botë i kanë sytë te dardanët tanë sonte."

Ai gjithashtu vuri në dukje mikpritjen e jashtëzakonshme në kryeqytet, duke siguruar se: "Nuk mendoj se sot ka me pasë fishkëllima ndaj himnit turk, fansat turq janë mirëpritur shumë mirë prej neve."

Nga ana tjetër, tifozët që kanë udhëtuar nga diaspora vetëm për këtë natë, besojnë te "mrekullia" që vjen nga dëshira dhe shpirti luftarak. "Turqia ka lojtarë më cilësorë, por shpresoj që me këtë energji e dëshirë të lojërave të fundit t'ia dalim. Kemi ardhë prej Frankfurtit vetëm për këtë," thotë një tjetër mbështetës i flaktë.

Sonte, në "arenën" e Prishtinës, pritet që atmosfera të jetë e jashtëzakonshme, ku mes emocioneve, parashikimeve dhe këngëve, do të vendoset fati i një ëndrre të madhe.

KosovaPress