Federata e Futbollit e Kosovës ka njoftuar se Gjykata e Arbitrazhit Sportiv (CAS) në Lozanë ka vendosur në favor të saj në çështjen e lidhur me moslicencimin e FC Prishtinës për garat evropiane në sezonin 2023/24.

Rasti kishte të bënte me një vendim të mëhershëm të Gjykatës së Arbitrazhit Sportiv të Kosovës (GJAS), organ i arbitrazhit sportiv që vepron në Kosovë për zgjidhjen e mosmarrëveshjeve sportive. Megjithatë, CAS ka vlerësuar se GJAS nuk kishte kompetencë për ta shqyrtuar këtë rast.

Sipas FFK-së, CAS ka konfirmuar se vendimi për moslicencimin e FC Prishtinës ishte në përputhje me rregulloret në fuqi, duke theksuar se “FFK-ja nuk i nënshtrohet juridiksionit të GJAS-it”.

Në vendim thuhet gjithashtu se “GJAS nuk kishte juridiksion për të shqyrtuar ankesën kundër vendimit të shkallës së dytë”, pasi sipas Statutit të FFK-së dhe rregulloreve të UEFA-s, vendimet e Organit të Apelit për Licencim mund të kundërshtohen vetëm në CAS në Lozanë.

FFK e cilësoi këtë si një fitore të rëndësishme juridike, duke theksuar se vendimi riafirmon autonominë e federatës dhe respektimin e standardeve të FIFA-s dhe UEFA-s në futbollin kosovar.

KosovaPress