Sonte në orën 21:00, vëmendja e të gjithë adhuruesve të futbollit do të jetë në përballjen e zjarrtë të Grupit I mes Francës dhe Senegalit.

Francezët vijnë në këtë Botëror si një nga favoritët kryesorë dhe synojnë të shkruajnë historinë, ndërsa Senegali kërkon të provojë përsëri veten në skenën e madhe pas humbjes së titullit të AFCON-it në fillim të vitit.

Të dyja skuadrat njihen për lojën e tyre sulmuese, gjë që premton një ndeshje të hapur dhe me shumë gola.

Ky takim rikthen në kujtesë njërën nga befasitë më të mëdha në historinë e futbollit.

Në vitin 2002, Senegali shokoi botën duke mposhtur kampionët e atëhershëm në fuqi, Francën, me rezultat 1-0 në ndeshjen hapëse. Që nga ajo kohë, Franca nuk ka humbur më asnjë ndeshje të parë në Botëror, andaj djemtë e Didier Deschamps do të bëjnë çmos që të shmangin një tjetër skenar të tillë pothuajse një çerek shekulli më vonë.

Formacionet e Mundshme:

• Franca (4-2-3-1): Maignan — Kounde, Upamecano, Saliba, Hernandez — Tchouameni, Rabiot — Olise, Dembele, Doue — Mbappe.
• Senegali(4-2-3-1): Mendy — Diouf, Niakhate, Koulibaly, Diatta — Camara, Gueye — Mane, Ndiaye, Sarr — Jackson.

KosovaPress