Agjencia e Ushqimit dhe Veterinarisë (AUV) u ka bërë thirrje të gjithë fermerëve që mbarështojnë derra të shtojnë masat e kujdesit dhe të zbatojnë me përpikëri rregullat e biosigurisë, për shkak të përhapjes së Mortajës Afrikane të Derrave (ASF) në vendet e rajonit.

Sipas AUV-së, ndonëse deri më tani në Kosovë nuk është konfirmuar asnjë rast i kësaj sëmundjeje, rreziku për përhapjen e saj mbetet i lartë, ndaj parandalimi është thelbësor për mbrojtjen e fermave dhe sektorit blegtoral.

Agjencia u ka kërkuar fermerëve të kufizojnë hyrjen e personave dhe automjeteve të panevojshme në ferma, të dezinfektojnë rregullisht hyrjet, pajisjet dhe automjetet, të shmangin kontaktin e derrave me derrat e egër, të mos përdorin mbetje ushqimore për ushqimin e kafshëve dhe të blejnë derra vetëm nga ferma të regjistruara me dokumentacion veterinar.

Po ashtu, fermerët janë ftuar që të njoftojnë menjëherë veterinerin ose zyrat rajonale të AUV-së nëse vërejnë ngordhje të papritura, temperaturë të lartë, mungesë oreksi, dobësi ose shenja të tjera të dyshimta te derrat.

AUV thekson se Mortaja Afrikane e Derrave nuk transmetohet te njerëzit dhe nuk paraqet rrezik për shëndetin publik, por është një sëmundje shumë ngjitëse për derrat, e cila mund të shkaktojë humbje të mëdha ekonomike nëse nuk respektohen masat e biosigurisë.

/Kosovapress/