Një sulm amerikan goditi aeroportin Iranshahr, në juglindje të Iranit, mëngjesin e së premtes, duke plagosur një person dhe duke shkaktuar dëme në instalimet elektrike dhe një rezervuar karburanti.

Televizioni shtetëror iranian bëri të ditur se, sipas autoriteteve iraniane, të paktën një predhë goditi aeroportin në provincën Sistan dhe Baluchestan, duke shkaktuar ndërprerje të energjisë elektrike. Ndërkaq, mediat e huaja raportojnë se një civil mbeti i plagosur si pasojë e sulmit.

Sulmi vjen në kohën kur operacionet ushtarake amerikane kanë vijuar në disa zona të Iranit jugor. Mediat iraniane raportuan gjithashtu për sulme ndaj urave pranë Bandar Khamir, ndërsa shpërthime dhe dëme janë regjistruar edhe në Bandar Abbas, Bushehr, ishullin Qeshm, Sirik dhe Ahvaz.

Përshkallëzimi i tensioneve në rajon nisi në shkurt, kur Shtetet e Bashkuara dhe Izraeli ndërmorën një ofensivë të përbashkët kundër Iranit. Teherani iu përgjigj me sulme me raketa dhe dronë ndaj objektivave në vendet e Gjirit që strehojnë asete amerikane.

Muajin e kaluar, Irani dhe SHBA-ja nënshkruan një memorandum mirëkuptimi të ndërmjetësuar nga Pakistani, me synimin për t’i dhënë fund konfliktit dhe për të arritur një marrëveshje paqeje. Megjithatë, ditët e fundit tensionet janë rritur sërish, veçanërisht rreth Ngushticës së Hormuzit, ku të dyja palët kanë shkëmbyer sulme.