Lajmet e fundit për përndjekje, shkarkime nga puna dhe ndëshkime ndaj qytetarëve serbë të Kosovës, nga eksponentë te Listës Serbe, përkrahur nga Beogradi, vetëm pse guxojnë të mbështesin subjekte të tjera politike serbe, janë thellësisht shqetësuese dhe të papranueshme, vlerëson avokati Arbër Jashari.

Javën që lamë pas, është raportuar se Beogradi po ndëshkon serbët që kundërshtojnë Listën Serbe, largime nga puna dhe presion në emër të “interesit kombëtar”.

Edhe ministri në detyrë për Komunitete dhe Kthim, Nenad Rashiq ka akuzuar Listën Serbe për “shtypje sistematike dhe masive” ndaj serbëve në Kosovë para zgjedhjeve të ardhshme.

E, përmes një reagimi në Facebook, Jashari ka thënë se institucionet e Kosovës duhet të ndërmarrin të gjitha masat e nevojshme që qytetarëve serbë t’u garantohet e drejta për ta shprehur vullnetin e tyre politik lirshëm, pa frikë dhe pa presion.

“Integriteti i zgjedhjeve duhet të mbrohet dhe të garantohet në çdo rrethanë”, ka shkruar ai, transmeton KosovaPress.

Jashari ka kujtuar se ndikimi në përcaktimin e lirë të votuesve është vepër penale dhe ndëshkohet sipas ligjit.

“Shantazhuesit, manipuluesit dhe mbjellësit e frikës duhet të mbajnë përgjegjësi para ligjit”, ka vijuar ai.

Sipas tij, nuk mund të ketë demokraci të plotë pa demokratizimin e çdo komuniteti në Kosovë.

“Pluralizmi politik brenda komuniteteve është i domosdoshëm dhe duhet të mbrohet e garantohet”, ka përfunduar Jashari.

/Kosovapress/