Botërori 2026, që po zhvillohet në Shtetet e Bashkuara të Amerikës, Kanada dhe Meksikë, pritet të hyjë në histori jo vetëm për formatin e zgjeruar me 48 kombëtare, por edhe për rekordet e shumta që mund të thyhen gjatë këtij edicioni. Me 104 ndeshje në program, kjo është Kupa e Botës më e madhe e organizuar ndonjëherë.

Një nga rekordet më të mundshme për t’u thyer është ai i numrit total të golave në një turne. Rekordi aktual është vendosur në Katar 2022 me 172 gola, ndërsa zgjerimi i formatit dhe rritja e numrit të ndeshjeve e bëjnë pothuajse të sigurt tejkalimin e kësaj shifre.

Vëmendja e madhe mbetet te dy ikonat e futbollit botëror, Lionel Messi dhe Cristiano Ronaldo. Të dy janë bërë lojtarët e parë në histori që marrin pjesë në gjashtë Kupa të Botës, duke vendosur një rekord të ri për paraqitje në turneun më prestigjioz të futbollit.

Messi gjithashtu ka mundësinë të sulmojë rekordin e golashënuesit më të mirë në historinë e Kupës së Botës. Argjentinasi ka 13 gola, vetëm tre më pak se rekordi prej 16 golash i legjendës gjermane Miroslav Klose. Në anën tjetër, francezi Kylian Mbappé, me 12 gola në Botërorë, mbetet gjithashtu një kandidat serioz për të sfiduar këtë rekord.

Ronaldo, i cili tashmë mban rekordin si lojtari i vetëm që ka shënuar në pesë Botërorë të ndryshëm, synon ta zgjerojë këtë arritje duke realizuar gol edhe në edicionin e gjashtë. Portugezi ka mundësi të vendosë edhe rekorde të tjera të lidhura me moshën, përfshirë atë të golashënuesit më të vjetër në fazën eliminatore të Kupës së Botës.

Një tjetër rekord që mund të thyhet lidhet me asistimet. Messi numëron tetë asistime në Botërorë dhe është vetëm një larg rekordit të Fritz Walterit, i cili kryeson me nëntë.

Botërori 2026 pritet të mbetet në histori si një nga edicionet më të pasura me rekorde, ndërsa legjendat e futbollit dhe yjet e rinj kanë mundësinë të shkruajnë kapituj të rinj në librat e historisë së këtij sporti.

KosovaPress