Ragip Xhaka, babai i futbollistit të njohur shqiptar Granit Xhaka, ka shprehur publikisht mbështetjen e tij për kandidatin për deputet Haki Morina në zgjedhjet parlamentare në Kosovë.

Përmes një mesazhi publik, Xhaka e ka vlerësuar Morinën si një njeri që ka qenë pranë qytetarëve jo vetëm gjatë fushatave zgjedhore, por në vazhdimësi.

“Ka njerëz që nuk janë pranë qytetarëve vetëm në kohë fushate, por në çdo kohë. Për mua, Haki Morina është njëri prej tyre. Përkushtimi, ndershmëria dhe gatishmëria e tij për të ndihmuar të tjerët e bëjnë të denjë për besimin tonë”, ka deklaruar Ragip Xhaka.

Ai ka bërë të ditur se mbështet kandidaturën e Haki Morinës, i cili garon me numrin 82 për një ulëse në Kuvendin e Kosovës.

Në fund të mesazhit të tij, Xhaka i ka uruar sukses Morinës në garën zgjedhore, duke theksuar se Kosova ka nevojë për njerëz të sinqertë dhe përfaqësues që punojnë në interes të qytetarëve.