Presidenti rus Vladimir Putin ka shpallur një armëpushim 32-orësh me Ukrainën për festën e Pashkëve Ortodokse, pas një oferte të mëparshme nga homologu ukrainas Volodymyr Zelensky për një ndërprerje të armiqësivem, shkruan CNN, transmeton KosovaPress.

Dekreti i Putinit urdhëron forcat ruse të respektojnë një armëpushim nga ora 16:00 e së shtunës (ora 9:00 ET) deri në fund të së dielës.

Deklarata e Kremlinit që njofton armëpushimin tha se forcat ruse u urdhëruan "të ndalojnë operacionet luftarake në të gjitha frontet gjatë kësaj periudhe. Trupat duhet të jenë të gatshme të zmbrapsin çdo provokim të mundshëm nga kundërshtari, si dhe çdo veprim agresiv nga ana e tij".

"Ne nisemi nga supozimi se pala ukrainase do të ndjekë shembullin e Federatës Ruse", shtoi Kremlini.

Presidenti i Ukrainës Zelensky kishte thënë më parë se ia kishte përcjellë ofertën e një armëpushimi të Pashkëve Rusisë nëpërmjet negociatorëve amerikanë.

Zelensky postoi në X se Ukraina ka kërkuar vazhdimisht një pauzë të armiqësive. "Ne propozuam një armëpushim gjatë festave të Pashkëve këtë vit dhe do të veprojmë në përputhje me rrethanat. Njerëzit kanë nevojë për një Pashkë pa kërcënime dhe një lëvizje të vërtetë drejt paqes, dhe Rusia ka një shans të mos kthehet në sulme edhe pas Pashkëve."

Shtetet e Bashkuara kanë ndërmjetësuar bisedimet midis të dërguarve nga Moska dhe Kievi, ndërsa lufta e Rusisë hyn në vitin e saj të pestë.

Përpjekjet e mëparshme për të siguruar armëpushime kanë pasur pak efekt. Putini shpalli një armëpushim 30-orësh Pashkët e kaluar, të cilin të dyja palët e akuzuan njëra-tjetrën për shkelje.