Në aksionin e sotëm të Partisë Socialdemokrate në Prishtinë, cak ishte Partia Demokratike e Kosovës.

Dardan Molliqaj kryetar i PSD-së tha se Bedri Hamza vetëm kryetar i kësaj partie nuk është sepse sipas tij, ky subjekt politik drejtohet nga klikë.

Bazuar në fotot që u shpalosën në këtë aksion, këtë "klikë" e udhëheq Uran Ismaili, ndërsa anëtarë të saj janë Vlora Çitaku, Abelard Tahiri dhe Memli Krasniqi.

"Qysh edhe e dini, partia më e madhe opozitare, asnjë kauzë, asnjë protestë, asnjë çështje të rëndësishme nuk e ka ndier. Shtrohet pyetja pse po i ndodh kjo Partisë Demokratike të Kosovës? Arsyeja më e thjeshtë dhe më e qëndrueshme është se këtë kryetar... është veç fytyra qysh keni me e parë sot, por realisht Partinë Demokratike të Kosovës e ka kapur një klikë, e cila e udhëheq...Udhëheqësi i klikës së PDK-së edhe i klanit brenda PDK-së është Uran Ismaili. Paramendojeni, nga katër anëtarët e kësaj klike, dy prej tyre as nuk garojnë: njëri ka qenë kryetar partie, tjetri ka qenë shef i grupit, ministra... as nuk hyjnë në garë fare, por janë vendimmarrësit në këtë parti", tha Molliqaj.

Këtu kishte edhe një qytetar që ishte i interesuar të dijë se kë po e kundërshton PSD-ja, pozitën apo opozitën.

Molliqaj u përgjigj duke thënë se e kundërshtojnë opozitën sepse sipas tij, nuk po kryejnë funksionin e tyre.

Lajmi në zhvillim...

/Kosovapress/