Më 16 dhe 17 maj, në Pallatin e Rinisë dhe Sportit në Prishtinë, do të zhvillohet edicioni i 18-të i Turneut Ndërkombëtar të Boksit për të Rinj U19 “Lah Nimani”.

Ky turne tradicional organizohet për herë të 18-të nga Federata e Boksit e Kosovës dhe i kushtohet figurës së shquar të boksit kosovar, trajnerit legjendar Lah Nimani. Turneu është pjesë e kalendarit zyrtar të Federatës Evropiane dhe Federatës Botërore të Boksit.

Në këtë edicion pritet pjesëmarrje e gjerë e boksierëve të rinj nga vendet e rajonit, Evropa dhe më gjerë, duke e shndërruar turneun në një platformë të rëndësishme për promovimin dhe zhvillimin e talenteve të reja.

Gjysmëfinalet zhvillohen të shtunën më 16 maj, në ora 16:00, kurse finalet luhen të dielën më 17 maj, duke filluar nga ora 12:00.

Ky manifestim sportiv jo vetëm që vazhdon një traditë të rëndësishme në boksin kosovar, por gjithashtu synon të forcojë bashkëpunimin ndërkombëtar.

KosovaPress