Presidenti i Hungarisë, Tamás Sulyok, ka pranuar të largohet nga detyra pas miratimit të një amendamenti kushtetues që i jep fund menjëherë mandatit të tij.

Amendamenti, i miratuar nga partia në pushtet Tisza e kryeministrit Péter Magyar, argumenton se ekziston një “humbje serioze e besimit” të shoqërisë ndaj presidentit, i cili ishte zgjedhur në fillim të vitit 2024 nga ligjvënësit e partisë nacionaliste Fidesz të ish-kryeministrit Viktor Orbán.

Sulyok deklaroi se nuk kishte mundësi tjetër përveçse të nënshkruante ndryshimin kushtetues, duke theksuar se respektonte detyrimin ligjor për të zbatuar vendimin. Megjithatë, ish-gjyqtari i Gjykatës Kushtetuese paralajmëroi se reforma përbën një goditje ndaj sundimit të ligjit në vend.

“Amendamenti i shtatëmbëdhjetë i kushtetutës ka shënuar një pikë kthese në demokracinë kushtetuese të Hungarisë”, tha Sulyok, duke kritikuar largimin e një zyrtari të lartë në një mënyrë që, sipas tij, krijon një precedent negativ për ndarjen e pushteteve dhe vlerat demokratike.

Ndryshimi kushtetues është pjesë e përpjekjeve të qeverisë së re të Péter Magyar për të çmontuar strukturat e krijuara gjatë viteve të qeverisjes së Viktor Orbán. Partia Tisza fitoi zgjedhjet e prillit dhe siguroi shumicën prej dy të tretash në parlament, duke i dhënë mundësinë për të ndryshuar edhe ligjet themelore të vendit.

Orbán ka kundërshtuar ashpër reformën, duke e cilësuar atë si një kërcënim për demokracinë. “Nëse kjo mund t’i bëhej presidentit, nesër askush nuk do të ishte i sigurt”, shkroi ai në një reagim në rrjetet sociale.

Pas dorëheqjes së Sulyok, kryetarja e parlamentit, Ágnes Forstthoffer, pritet të marrë përkohësisht detyrën e presidentes, deri në zgjedhjen e kreut të ri të shtetit.

Ndërkohë, reforma parashikon edhe kufizime të reja për ligjvënësit, me një mandat maksimal prej 12 vitesh, si dhe një moshë pensioni 70-vjeçare për gjyqtarët e Gjykatës Kushtetuese, një masë që prek edhe drejtuesin aktual të kësaj gjykate, Péter Polt, i konsideruar aleat i Viktor Orban, transmeton TCh.

Péter Magyar e ka akuzuar prej kohësh Sulyok se nuk ka përfaqësuar unitetin kombëtar dhe se ka mbështetur interesat e qeverisë së mëparshme të Orbán-it.