Policia e Kosovës ka dhënë detaje lidhur me aksidentin e rëndë të trafikut në të cilin ka humbur jetën futbollisti 22-vjeçar Fatjon Bunjaku.

Sipas njoftimit policor, aksidenti ka ndodhur më 7 qershor 2026, rreth orës 00:55, në rrugën nacionale Mitrovicë–Prishtinë, në segmentin rrugor në zonën e fshatit Maxhunaj të Vushtrrisë. Në aksident është përfshirë një veturë.

Si pasojë e aksidentit, drejtuesi i automjetit dhe dy pasagjerë kanë pësuar lëndime trupore dhe janë dërguar për trajtim mjekësor. Megjithatë, rreth orës 07:50, Policia ka pranuar njoftim nga Shërbimi Spitalor Klinik Universitar i Kosovës se, pavarësisht përpjekjeve të stafit mjekësor, drejtuesi i automjetit, Fatjon Bunjaku, ka ndërruar jetë si pasojë e plagëve të marra në aksident.

Me urdhër të prokurorit kompetent, trupi i pajetë i 22-vjeçarit është dërguar në Institutin e Mjekësisë Ligjore për obduksion.

Policia ka bërë të ditur se hetuesit e Njësisë Rajonale të Trafikut janë duke zhvilluar hetime për të sqaruar rrethanat dhe shkaqet që çuan në këtë aksident tragjik.

Vdekja e Bunjakut ka tronditur komunitetin sportiv në Kosovë. Futbollisti nga Vushtrria ishte i njohur në futbollin kosovar dhe humbja e tij në moshë të re ka ngjallur reagime të shumta nga familjarë, miq, bashkëlojtarë dhe institucione sportive.

KosovaPress