Kapiteni i Manchester United, Bruno Fernandes, ka shpërthyer në akuza të rënda ndaj legjendës së klubit, Roy Keane, duke e quajtur atë publikisht "gënjeshtar".

Kjo deklaratë vjen pas një jave historike për portugezin, i cili të dielën kundër Brightonit regjistroi asistimin e tij të 21-të në Premier Ligë, duke thyer rekordin historik të Thierry Henry dhe Kevin De Bruyne.

Sherri mes tyre nisi kur Keane e kritikoi ashpër Fernandesin në emisionin "The Overlap", duke pretenduar se portugezi kishte pranuar që po luante për të thyer rekorde personale dhe jo për të mirën e skuadrës. Megjithatë, kjo akuzë e Keane erdhi nga keqinterpretimi i një deklarate ku Bruno thjesht kritikon veten për një rast të humbur ndaj Nottingham Forest.

Gjatë një interviste të dhënë së fundmi për "The Diary of a CEO", siç raporton portali i njohur britanik Daily Mail Sports, Fernandes zbuloi se kishte kërkuar edhe numrin e Keane për t'u sqaruar personalisht me të.

"Gjithmonë kam thënë se nuk më prish punë kritika... Ajo që nuk më pëlqen është kur njerëzit gënjejnë për gjëra, dhe në këtë rast, ajo që ka thënë Roy Keane është gënjeshtër. Fatmirësisht për mua çdo gjë është e regjistruar," deklaroi Fernandes.

Mesfushori zbuloi se kishte kontaktuar ish-trajnerin Ole Gunnar Solskjaer për të gjetur kontaktin e Keane.

"Madje i kërkova Ole-s numrin e tij për t'i dërguar një mesazh e për të biseduar, për t'i thënë: 'Nuk më pengon kritika, por nuk më pëlqen kur njerëzit gënjejnë për gjërat që them', sepse kjo i kalon kufijtë e asaj që unë e konsideroj të pranueshme."

Fernandes shtoi se nuk e ka problem nëse Keane e quan lojtar apo kapiten të keq, por nuk mund të pranojë që t'i tjetërsohen fjalët.

"Ai mund të më kritikojë, të më 'vrasë', të thotë se nuk jam mjaftueshëm i mirë apo që nuk jam një kapiten i mirë për klubin... Është opinioni i tij. Por do të preferoja që Roy Keane të më jepte ndonjë lëvdatë ndonjëherë, sepse kam arritur diçka që nuk e kanë arritur shumë lojtarë," përfundoi ylli i United.

Pavarësisht kritikave të Keane, sezoni i Bruno Fernandesit mbetet statistikisht i jashtëzakonshëm. Përveç 21 asistimeve, ai krijoi plot 136 shanse për gol gjatë këtij edicioni në Premier Ligë, duke lënë pas ndjekësin më të afërt, Dominik Szoboszlai, i cili krijoi vetëm 78 sosh.

KosovaPress