Federata e Xhudos së Kosovës ka kujtuar pesëvjetorin e një prej momenteve më të rëndësishme në historinë e sportit kosovar, medaljen e artë olimpike të Distria Krasniqit në Lojërat Olimpike Tokio 2020.

Më 24 korrik të vitit 2021, Krasniqi shkroi historinë duke u shpallur kampione olimpike në kategorinë deri në 48 kilogramë, duke i sjellë Kosovës medaljen e parë të artë në ato Lojëra Olimpike dhe një tjetër sukses të madh në skenën ndërkombëtare.

Në njoftimin e saj, Federata e Xhudos ka vlerësuar këtë triumf si një moment të veçantë për sportin e Kosovës, të arritur nën drejtimin e kryemjeshtrit Driton Kuka.

“Një triumf historik, nën drejtimin e Kryemjeshtrit Driton Kuka, që vazhdon të na bëjë krenarë edhe sot”, thuhet në postimin e Federatës së Xhudos së Kosovës.

Suksesi i Krasniqit në Tokio ishte medalja e dytë olimpike e artë për Kosovën, pas asaj të fituar nga Majlinda Kelmendi në Rio 2016, duke e konfirmuar xhudon si sportin më të suksesshëm në historinë olimpike të vendit.

KosovaPress