Pesë turistë italianë që ishin zhdukur gjatë një zhytjeje me skuba në Maldive janë gjetur të vdekur, kanë raportuar të enjten mediat lokale.

Aksidenti ndodhi në atollet Vaavu, sipas disa mediave lokale, sipas ANSA-s, transmeton KosovaPress.

Sipas raportimeve fillestare, gazeta online Edition.mv shkruan se pesë turistët, që ndodheshin në bordin e anijes “Duke of York”, një anije zhytjeje e huaj (liveaboard), u zhdukën gjatë një zhytjeje pranë Alimathaa.

Ata u zhytën në mëngjes, ndërsa ekuipazhi raportoi zhdukjen e tyre kur ata nuk dolën në sipërfaqe deri në mesditë.

Megjithëse policia ka konfirmuar se ka nisur hetimet për vdekjet, shkaku i tyre mbetet ende i panjohur dhe nuk është publikuar asnjë deklaratë zyrtare, përcjell KosovaPress.

Edhe kushtet atmosferike në vendin e zhytjes kanë qenë të pafavorshme gjatë ditës, deri në atë pikë sa shërbimi meteorologjik ka lëshuar një alarm të verdhë për zonën, i cili është ende në fuqi.

Ministria e Punëve të Jashtme e Italisë, Farnesina, tha se po e ndjek rastin dhe se po bëhet ende rindërtimi i ngjarjes.

“Pas një aksidenti që ndodhi gjatë një zhytjeje me skuba, pesë italianë kanë vdekur në atollin Vaavu, Maldive”, konfirmoi Ministria e Jashtme në një deklaratë.

“Zhytësit”, thuhet më tej, “me sa duket kanë humbur jetën teksa po përpiqeshin të eksploronin shpella në një thellësi prej 50 metrash. Autoritetet e Maldiveve po vazhdojnë hetimet për aksidentin”.

“Ministria e Jashtme dhe Ambasada Italiane në Kolombo”, përfundon deklarata, “kanë ndjekur rastin me vëmendjen më të madhe që nga raportimi i parë; zyra po kontakton familjet e viktimave për të ofruar çdo ndihmë të nevojshme konsullore”.