Në një supermarket në jug të Berlinit, një burrë po mban peng një grua që prej orëve të vona të mbrëmjes së të premtes. Pak pas orës 22:00, autori e mori gruan nën kontroll në supermarketin Rewe në lagjen Marienfelde dhe e kërcënoi atë, tha një zëdhënës i policisë për agjencinë e lajmeve dpa.

“Operacioni vazhdon ende”, deklaroi ai rreth orës 5:30 të mëngjesit. Supermarketi ndodhet në rrugën Hildburghauser Straße, në kryqëzim me Tirschenreuther Ring.

“Ne jemi në kontakt me pengmarrësin, me burrin”, shtoi zëdhënësi. Ai bëri të ditur se në terren ndodhen forca policore të trajnuara posaçërisht për raste të tilla. Për momentin nuk dihen ende motivet dhe rrethanat e ngjarjes.

Supermarketi është rrethuar nga policia, njofton DPA. Njësia Speciale e Policisë (SEK) është pozicionuar përpara ndërtesës, me shumë automjete policie, autoambulanca dhe zjarrfikës.

Në orët e para të mëngjesit, efektivët vendosën një shkallë pranë ndërtesës për të siguruar një pamje të brendshme të supermarketit. Pas kordonit të sigurisë, përballë supermarketit, prisnin disa punonjës të marketit. Ata ishin mbështjellë me batanije të holla që ua kishte siguruar shërbimi i emergjencës. Sipas informacioneve të dpa-së, punonjësit ndodheshin brenda dyqanit në momentin kur ndodhi incidenti.