Përfaqësuesja e Norvegjisë ka tërhequr vëmendjen para fillimit të Kupës së Botës 2026 me përgatitjet e saj të veçanta.

Sipas YahooSports, skuadra nordike ka transportuar plot 300 kilogramë salmon, 116 kilogramë djathë tradicional norvegjez (brunost) dhe 6 mijë portokaj në kampin stërvitor në Greensboro të Karolinës së Veriut.

Përveç ushqimeve, norvegjezët kanë marrë me vete edhe tre kuzhinierë profesionistë, mes tyre edhe shefin e njohur Aron Espeland, i cili punon me kombëtaren prej më shumë se 35 vitesh.

Stafi i Norvegjisë beson se ushqimi i njohur dhe i kontrolluar do t’i ndihmojë futbollistët të ruajnë formën optimale dhe të ndihen më komodë gjatë turneut. Rikthimi i Norvegjisë në Kupën e Botës pas 28 vitesh ka bërë që federata të mos lërë asgjë rastësisë në përgatitjet për turneun më të madh të futbollit.

Me yje si Erling Haaland dhe Martin Ødegaard në përbërje, norvegjezët shpresojnë që kjo përgatitje e veçantë t’i ndihmojë të realizojnë një paraqitje historike në Botërorin 2026.

KosovaPress