Deputetët e Kuvendit të Kosovës kanë përfshirë edhe katër marrëveshje ndërkombëtare për shqyrtim në seancën e sotme, raporton KosovaPress.

Ky plotësim-ndryshim i rendit të ditës u bë me kërkesë të Lëvizjes Vetëvendosje.

Shefja e Grupit Parlamentar të LVV-së, Arbërie Nagavci, tha se katër marrëveshjet ndërkombëtare, ku përfshihet kredia për projekte të sektorit financiar, janë të domosdoshme për sigurimin e burimeve financiare për zhvillimin ekonomik të Kosovës.

“Katër këto marrëveshje, gjegjësisht projektligje, janë të domosdoshme për sigurimin e burimeve financiare të favorshme për zhvillimin ekonomik të vendit si dhe përmbushjen e obligimeve ndërkombëtare”, tha ajo.

Përkrahje këtij plotësim-ndryshimi të rendit të ditës i dhanë në PDK dhe AAK, mirëpo këta të fundit thanë që kjo le të jetë hera e fundit që mazhoranca sjell ndryshim të rendit të ditës në momentin e fundit.

Shefi i deputetëve të AAK-së, Besnik Tahiri, tha se kjo formë nuk është e pranueshme për partinë e tij.

“Kjo le të jetë hera e fundit që na sillni marrëveshje ndërkombëtare, duke ditur që ne si GP jemi zotuar se i votojmë marrëveshjet ndërkombëtare, por më nuk pranojmë asnjë kërkesë që paraprakisht nuk kemi një informacion prej LVV-së, pasi nuk bëhet nami përmes një sms ose takimi në Grupin Parlamentar tonë”, tha ai.

Ndërkaq, kundër ndryshimit të rendit të ditës me këto katër marrëveshje u shpreh LDK-ja përmes deputetit, Besian Mustafa.

“Parimisht jemi për marrëveshjet ndërkombëtare, por në këtë rast kërkojmë afat shtesë që të gjithë deputetët të kemi afat t’i analizojmë këto dhe të arrijmë te një qëndrim i përbashkët i LDK-së, prandaj në këtë rast nuk e përkrahim”, tha ai.

/Kosovapress/