Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, së bashku me ambasadorin e Zvicrës në Kosovë, Jürg Sprecher, kanë nënshkruar marrëveshjen pesëvjeçare për zbatimin e projektit “Transformimi i Gjelbër i Ndërmarrjeve Private në Kosovë (GPEK)”.

Në komunikatën për media thuhet se marrëveshja është realizuar ndërmjet Ministrisë së Industrisë, Ndërmarrësisë, Tregtisë dhe Inovacionit dhe Agjencisë Zvicerane për Zhvillim dhe Bashkëpunim (SDC), me bashkëfinancim nga Agjencia Suedeze për Zhvillim Ndërkombëtar (SIDA), dhe do të zbatohet gjatë periudhës 2026–2031.

“Përmes këtij projekti, me vlerë të përgjithshme prej 8.78 milionë frangash zvicerane, synohet mbështetja e tranzicionit të gjelbër të sektorit privat në Kosovë, me fokus në rritjen e konkurrueshmërisë dhe qëndrueshmërisë klimatike të ndërmarrjeve të vogla dhe të mesme”, thuhet në komunikatë.

Projekti, sipas komunikatës, do të kontribuojë në promovimin e teknologjive më të pastra, rritjen e efikasitetit të përdorimit të burimeve, adoptimin e praktikave të qëndrueshme të biznesit dhe krijimin e mundësive të reja për zhvillim ekonomik.

Po ashtu, bëhet e ditur se ministrja Kusari-Lila ka theksuar se transformimi i gjelbër i industrisë dhe ekonomisë është një nga prioritetet strategjike të ministrisë, duke shtuar se investimet në inovacion, teknologji të qëndrueshme dhe zhvillim të sektorit privat janë thelbësore për rritjen ekonomike afatgjatë të vendit.

“Projekti do të ndihmojë në fuqizimin e ndërmarrjeve vendore, promovimin e investimeve të gjelbra, krijimin e vendeve të reja të punës dhe përfshirjen më të madhe të kategorive të nënpërfaqësuara në zhvillimin ekonomik”, citohet të ketë thënë Kusari Lila, transmeton KosovaPress.

Me këtë rast, ministrja falënderoi Qeverinë e Zvicrës, SDC-në, SIDA-n dhe partnerët e tjerë për mbështetjen e vazhdueshme ndaj Kosovës dhe besimin në potencialin zhvillimor dhe ekonomik të vendit.