Ambasada e Mbretërisë së Bashkuar në Kosovë ka mirëpritur emërimin e Zejnullah Gashit në pozitën e Kryeprokurorit të Shtetit, pas një ndërprerjeje disa vjeçare në këtë funksion.

Përmes një reagimi publik, ambasada i ka uruar suksese Gashit në ushtrimin e detyrës, duke theksuar rëndësinë e zbatimit të masave të nevojshme për ta forcuar sistemin prokurorial të Kosovës si një institucion të pavarur, transparent dhe llogaridhënës.

Sipas Ambasadës Britanike, funksionimi efektiv dhe efikas i prokurorisë është thelbësor për forcimin e sundimit të ligjit dhe për avancimin e luftës kundër krimit të organizuar dhe korrupsionit, në dobi të të gjithë qytetarëve të Kosovës.

Zejnullah Gashi u emërua Kryeprokuror i Shtetit më 14 korrik 2026, pasi ushtruesja e detyrës së Presidentes, Albulena Haxhiu, dekretoi emërimin e tij, bazuar në propozimin e Këshillit Prokurorial të Kosovës.

Me këtë dekretim u përmbyll një periudhë gati katërvjeçare gjatë së cilës Kosova nuk kishte një Kryeprokuror të Shtetit me mandat të plotë.

Gashi do ta ushtrojë këtë detyrë për një mandat shtatëvjeçar.

/Kosovapress/