Kryeministri në detyrë, Albin Kurti po i mban qytetarët nën kontroll përmes frikës dhe joshjes, thotë kandidati për deputet nga radhët e PDK-së, Artan Behrami.

Sipas tij, lideri i LVV-së po e përdor buxhetin e shtetit për t’i joshur financiarisht qytetarët në prag të zgjedhjeve të 7 qershorit.

Behrami në “Intervista Zgjedhore” të KosovaPress e cilëson Kurtin si një autokrat që di të qeverisë vetëm përmes krizës ndërsa shton se normaliteti në vend “do të rikthehet vetëm përmes ardhjes në pushtet të PDK-së”.

Sipas tij, dështimet në qeverisjen e partisë Vetevendosje dhe mungesa e projekteve kapitale po mbulohen me një strategji të mirëmenduar, e cila, sipas tij, bazohet në dy shtylla kryesore: frikën dhe joshjen financiare.

Behrami thotë se nga njëra anë, qytetarët po bombardohen me deklarata për luftë dhe rrezik nga Serbia, ndërsa nga ana tjetër po “blihen” me ndihma sociale dhe lëmosha shtetërore para zgjedhjeve.

“Albin Kurti ka arritur t'i bëjë dy gjëra që populistët dhe autokratët e tjerë nuk kanë arritur t’i bëjnë. Sepse në të kaluarën autokratët, përmes frikës, shtypjes dhe përndjekjes, kanë arritur të ruajnë pushtetin. Albin Kurti po i bën të dyja: edhe shtypjen, edhe përndjekjen politike, edhe frikën, por edhe joshjen. Dhe të shpjegoj cilat janë ato. Frika në Kosovë, ky e ka injektuar prej ditës së parë. Ju i keni parë deklaratat sistematike të Albin Kurtit që Serbia është në kufi, Serbia ka me na ra sot, Serbia ka me na ra nesër. Kjo është frika e jashtme. Frika e brendshme: i kemi ca gazetarë që i marrin paratë me çanta prej Serbisë për të na sulmuar ne. I kemi ca parti politike të lidhura me Serbinë, që janë kundër shtetit të Kosovës...Kushdo që thotë kemi rrezik nga Serbia, gjithkush i beson. Por çfarë ka bërë ky është se ka arritur ta injektojë këtë ide të destabilitetit, të luftës: jashtë e kemi Serbinë, brenda e kemi Serbinë, çirren komandantët, po më sulmojnë mua. Dhe kjo frikë, dëgjo, ta suspendon logjikën... Dhe elementi i dytë me të cilin ka operuar është joshja. Para zgjedhjeve, pas zgjedhjeve, gjatë zgjedhjeve, gjithmonë ky e ka përdorur joshjen përmes buxhetit, përmes keqpërdorimit të buxhetit, në kundërshtim me ligjin, me dhënë shtesa”, thotë ai.

Behrami thekson se PDK përfaqëson alternativën e vetme për ta nxjerrë vendin nga ky kaos i vazhdueshëm, duke ofruar një vizion të ri ekonomik dhe zhvillimor me Bedri Hamzën, që sipas tij, zëvendëson politikën e frikës dhe krizave, me atë të stabilitetit dhe zhvillimit.

“Motivi kryesor i partisë është i etabluar edhe në sloganin tonë: ‘Kosova është lodhur nga krizat’. Është lodhur nga krizat, nga kaosi i njëpasnjëshëm. Dhe atë çfarë kemi parë këto gjashtë vjet, e sidomos këto dy vjet, është një njeri i cili ka investuar në mënyrë permanente në krijimin e krizave, sepse kriza është habitati ku ai krijon një platformë për të mos qeverisur. Ai nuk di të qeverisë. Albin Kurti dihet se u bë kryeministër, por çfarë pune ka marrë? Kurrë punë s’ka punuar. Kurrë rrogë, as në shtet, as në sektorin privat nuk ka marrë... Ai nuk ka krijuar kulturë pune as në institucione, as jashtë institucioneve, dhe rrjedhimisht nuk di të qeverisë. Ju e keni parë. I ka pasur 20 miliardë buxhet, asnjë projekt nuk mund të dalë Lëvizja Vetëvendosje të thotë: cilat janë tre projektet më të mëdha që i kanë bërë në Kosovë? Nuk dinë t’i numërojnë”, deklaron ai.

Kosova shkoi në zgjedhje të parakohshme parlamentare për shkak të dështimit të zgjedhjes së presidentit. Kandidati për deputet i PDK-së deklaron se vendi mund të përballet sërish me zgjedhje gjatë këtij viti nëse nuk ka konsensus dhe kompromis për ta zgjedhur të parin e vendit.

“Po shpresoj që qytetarët e Republikës së Kosovës, kësaj radhe, nuk do t’ia japin besimin atij që do t’i çojë prapë në zgjedhje. Albin Kurti do të na çojë në zgjedhje, nëse e ka besimin e qytetarëve, edhe në dimër, por edhe në pranverë. Prandaj e vetmja formë për ta ndaluar këtë cikël krizash, këtë cikël kaosi, këtë cikël pasigurie, është që qytetarët të mos ia votojnë më këtij njeriu. Sepse po e votuan, po t’i japin fuqi, ai njeri ka me e çuar vendin prapë në zgjedhje”, potencon Behrami.

Në anën tjetër, Behrami i doli në mbrojtje kryetarit të Skenderajt, Sami Lushtaku, lidhur me incidentin e fundit me kryetarin e degës së Lëvizjes Vetëvendosje në këtë komunë, Hysni Mehani.

Sipas ish deputetit të PDK-së, ajo çka ka ndodhur javën e kaluar ka qenë një inskenim i qëllimshëm i LVV-së për ta provokuar Lushtakun dhe për të luajtur rolin e viktimës, më pas.

Madje, ai akuzoi kryeministrin në detyrë, Albin Kurti, se po kërkon viktima në këto zgjedhje.

“Çka ka ndodhur në Skenderaj, ka ndodhur një inskenim nga dhomat e errëta të VV-së, ku ky skenar është institucionalizuar. Është bërë skenar shtetëror përmes Sveçlës dhe Albin Kurtit. Të shkosh dhe ta provokosh një njeri që është bashkëluftëtar i Adem Jasharit, i cili në Spiegel në vitin 1998 thotë se është në gjendje krejt familjen me e fliju për pavarësinë e Kosovës, që ishte plagosur në luftë. Shkojnë dhe i thonë ‘Sami Serbia’. Dhe cila ka qenë tendenca? Kur e ka parë Albin Kurti zotin Mehani, Albini ka qenë njeriu më i dëshpëruar në Kosovë. Ai ka shpresuar që ai do të vritej ose do të plagosej...Albin Kurti në këto zgjedhje po kërkon viktimë. Po kërkon gjak. Ai pa viktimë e pa gjak nuk mundet me e bërë fushatën...Sami Lushtaku nuk është individ. Kur i thua ti ‘Sami Serbia’, i thua krejt Drenicës se jeni me Serbinë. I thua Adem Jasharit, i thua Lladrovcit, i thua tërë atyre që jeni me Serbinë. Sepse ai përfaqëson një popull atje, përfaqëson një epokë dhe një periudhë”, përfundon ai. /KosovaPress/