Procesi i votimit në Qendrën e Votimit “Naim Frashëri” në Prishtinë është zhvilluar pa probleme gjatë gjithë ditës së zgjedhjeve.

Në një prononcim për gazetarin Erduan Zeqiri në një transmetim të drejtpërdrejtë të Kosovapress, drejtoresha e shkollës, Merita Haxhiu Hashani, bëri të ditur se gjithçka ka shkuar sipas planit.

Sipas saj, në këtë qendër votimi të drejtë vote kanë pasur 8,636 qytetarë, ndërsa pjesëmarrja ka arritur rreth 50 për qind.

“Procesi ka shkuar në rregull. Kemi bërë të gjitha përgatitjet e nevojshme dhe janë rregulluar 10 vendvotime. Nuk ka ndodhur asnjë problem gjatë ditës. Fluksi më i madh i votuesve ka qenë në orët e mëngjesit, për shkak të temperaturave më të përshtatshme”, deklaroi Hashani.

Me mbylljen e vendvotimeve në orën 19:00, komisionerët kanë nisur procedurat për mbylljen e qendrës dhe përgatitjet për numërimin e votave. Në këtë qendër, dita zgjedhore u karakterizua nga një proces i qetë dhe i rregullt.

KosovaPress