Pas Prishtinës së Re, një tjetër reagim tejet i ashpër ka ardhur në drejtim të ndarjes së drejtësisë në xhiron e 35-të, kësaj radhe nga taborri i FC Malishevës.

Përmes një komunikate zyrtare në faqen e tyre në Facebook, menjëherë pas humbjes 3-2 ndaj Llapit në Podujevë, malishevasit kanë hedhur akuza të rënda, duke zbuluar se në këtë takim pati edhe probleme të dyshimta teknike me teknologjinë.

Në reagimin e tyre, klubi thekson se kulmi i dëmtimit erdhi nga referi kryesor, Lirim Jashari, ndërsa kanë mbetur të habitur me mosfunksionimin e sistemit VAR:

"Në këtë ndeshje ÇUDITËRISHT nuk funksionoi sistemi VAR dhe kjo ishte befasia e parë për ne! Si klub vlerësojmë punën e gjyqtarëve, por tashmë është bërë e tepërt dhe sot ishte kulmi nga gjyqtari kryesor, i cili me vendime kontraverse edhe sot sikurse në disa ndeshje tjera na dëmtoi. Çka është e tepërt, është e TEPËRT!"

Nga udhëheqësia e klubit të Malishevës kanë paralajmëruar se nuk do të heshtin përballë kësaj ndarjeje të drejtësisë dhe se zyrtarisht do t'i drejtohen të gjitha organeve përgjegjëse në Federatën e Futbollit të Kosovës për të kërkuar llogari.

KosovaPress