Kuvendi i Kosovës ka miratuar shtatë marrëveshje ndërkombëtare. Në seancën e sotme, deputetët e mazhorancës dhe me ndihmën e deputetëve të LDK-së dhe të AAK-së, i dhanë dritën e gjelbër marrëveshjes ndërkombëtare për qasje në arsimin e lartë dhe pranim për studime në Ballkanin Perëndimor.

Po ashtu, Kuvendi me 81 vota miratoi ratifikimin e Amendamentit nr. 3 të Marrëveshjes Financiare ndërmjet Republikës së Kosovës dhe Bashkimit Evropian për Programin IPA 2018, si dhe marrëveshjen për Amendamentin nr. 2 të Marrëveshjes Financiare ndërmjet Republikës së Kosovës dhe Bashkimit Evropian për Programin IPA 2017.

Deputetët ratifikuan edhe marrëveshjen e kredisë mes Republikës së Kosovës dhe Bankës Evropiane për Investime për Projektin Energjia Diellore Fotovoltaike në KEK – Porta Globale. Përkrahje iu dha edhe kredisë me Bankën Evropiane për Rindërtim dhe Zhvillim (BERZh) për Projektin e efiçencës së energjisë në ndërtesa publike.

Krahas kësaj, deputetët ratifikuan edhe marrëveshjen e kredisë “Projekti i Rrugës me Shpejtësi të Lartë Prishtinë - Mitrovicë” (kredi shtesë) ndërmjet Fondit Saudit për Zhvillim dhe Republikës së Kosovës.

Përkrahje iu dha edhe marrëveshjes për ratifikimin e kredisë tjetër me Bankën Evropiane për Rindërtim dhe Zhvillim për projektin “Impianti për Trajtimin e Ujërave të Zeza në Podujevë”.

Ndërkaq nuk pati kuorum për miratimin e katër marrëveshjeve të tjera ndërkombëtare të cilat u përfshinë në rendin e ditës gjatë seancës së sotme, pasi nuk morën pjesë në votim deputetët e LDK-së, të cilët nuk u pajtuan që në procedurë të përshpejtuar të përfshihen në rend të ditës.

Në votimin e këtyre marrëveshjeve nuk ishin prezentë deputetët e PDK-së, ndërkaq deputetët e Listës Serbe nuk morën pjesë në votim./KosovaPress/