Kryeministri i Kosovës, Albin Kurti, ka uruar liderin e opozitës hungareze, Peter Magyar, për fitoren në zgjedhjet në Hungari, duke e cilësuar atë si një mbështetje për vlerat e Bashkimit Evropian.

“Urime Peter Magyar për fitoren në zgjedhje në Hungari. Kosova mirëpret mbështetjen e popullit hungarez për vlerat e Bashkimit Evropian dhe presim të bashkëpunojmë së bashku”, ka shkruar Kurti.

Sipas rezultateve paraprake, partia Tisa e drejtuar nga Magyar ka siguruar një shumicë të fuqishme parlamentare prej dy të tretash, duke fituar 138 nga 199 ulëset në parlamentin hungarez.

Ndërkohë, kryeministri aktual Viktor Orbán dhe partia e tij Fidesz kanë siguruar vetëm 55 vende, duke pësuar një humbje të thellë pas shumë vitesh në pushtet.

E vetmja parti tjetër që ka arritur të hyjë në parlament është Mi Hazánk, e cila ka fituar gjashtë ulëse.

Në përqindje, Magyar ka fituar 53.6% të votave, kundrejt 37.7% të Orbán, ndërsa e djathta ekstreme ka marrë 5.9%.

Procesi i numërimit është drejt përfundimit, me mbi 97% të votave të numëruara, duke konfirmuar një ndryshim të madh politik në Hungari.

/Kosovapress/