Kryeministri Albin Kurti dhe ministrja e Industrisë Rozeta Hajdari morën sot pjesë në Forumin e dytë Ekonomik Kosovë-Kroaci në Zagreb.

Në fjalën e tij, kryeministri Kurti shprehu se kjo ngjarje simbolizon përkushtimin për forcimin e marrëdhënieve ekonomike dhe bashkëpunimit ndërmjet dy vendeve, duke thënë se Kosova është një treg i rëndësishëm që po zhvillohet vazhdimisht.

“Besojmë se së bashku me Kroacinë do të kontribuojmë në krijimin e mundësive të reja për ekonominë rajonale dhe globale. Ne jemi të përkushtuar për një mjedis biznesi të sigurt, të qëndrueshëm dhe konkurrues. Dyert tona janë gjithmonë të hapura për investime të reja. Qëllimi ynë është i qartë - ta bëjmë Kosovën një nga tregjet më tërheqëse në Evropën Juglindore. Kosova është treg për kompanitë, por në të njëjtën kohë qeveria jonë do të jetë partneri juaj”, tha Kurti.

I pari i Qeverisë së vendit tonë, ka folur edhe për dyfishimin e eksporteve dhe  investimeve të huaja, rritjen e qarkullimit të bizneseve më 2023 për gati 60% në krahasim me 2019 dhe përparësitë që ka Kosova për investitorë të huaj.

Ndër të tjera përmendi miratimin e Ligjit të ri për investimet e huaja, krijimin e Agjencisë për Investime dhe Eksporte, forcimin e kornizës ligjore për siguri maksimale për bizneset në Kosovë, zhvillimin e strategjive mbi shkëmbimin e përvojave dhe inovacioneve me vende tjera sikurse Kroacia, si dhe zhvillimi i sektorëve të energjisë, infrastrukturës dhe digjitalizimit.

Kosova nënshkruan marrëveshjen për sigurime shoqërore me Kroacinë • KosovaPress

Ndërsa, ministrja Hajdari tha se Kosova po përjeton rritje të vazhdueshme ekonomike, duke përmendur mundësitë për zgjerim të sektorit industrial, përmirësimin e të bërit biznes, strategjia për zhvillim industrial dhe mbështetjen e biznesit 2030, nxitja e punësimit dhe rritja e kualifikimit të fuqisë punëtore. 

Kosova e Kroacia nënshkruajnë marrëveshjen për njohjen e patentë-shoferëve • KosovaPress

"Shpreh gatishmërinë të iniciojmë marrëveshje të reja për bashkëpunim ekonomik, për të forcuar lidhjet për biznese dhe fusha tjera ekonomike, për të krijuar komitetin e përbashkët ekonomik mes dy vendeve dhe për të iniciuar krijimin e komisioneve për të nënshkruar traktatin e përbashkët për investime", tha Hajdari.

Milanoviq: Kosova duhet të njihet nga të gjitha anëtaret e BE-së • KosovaPress

Ky ishte forumi i dytë ekonomik ndërmjet dy vendeve pas atij në Kosovë në janar 2023. Kryeministri Kurti ndodhet për vizitë pune në Kroaci, ku gjatë ditës ka takuar krerët e shtetit, si dhe janë nënshkruar marrëveshje ndërmjet delegacioneve të dyja vendeve. Kurti më pas do të vazhdojë vizitën në Slloveni.