Sukseset e jashtëzakonshme të ekipit të notit të Kosovës në garën ndërkombëtare “Golden Orlando 2026” në Dubrovnik kanë marrë jehonë të madhe, jo vetëm për medaljet e shumta, por edhe për rekordet e reja kombëtare që u vendosën, raporton KosovaPress.

Pas këtij triumfi, duke folur për KosovaPress, trajnerja e ekipit, Vlera Llalloshi, së bashku me dy notaret e suksesshme të garës, Erina Idrizaj dhe Riga Shala, kanë ndarë emocionet dhe vlerësimet e tyre për këtë paraqitje historike.

Llalloshi vlerësoi lart paraqitjen e ekipit të Kosovës, duke theksuar suksesin e madh me medalje dhe rekorde të shumta.

“Përfaqësuesja e Kosovës në garën Golden Orlando, që është mbajtur në Dubrovnik të Kroacisë, ka pasur një paraqitje të shkëlqyer. Kemi arritur gjithsej 33 medalje dhe shumë rekorde” – tregoi Vlera Llalloshi.

Tutje trajnerja bëri të ditur se pavarësisht sukseseve të notuesve, sfidat vazhdojnë dhe kushtet infrastrukturore mbeten problem kryesor për zhvillimin e sportit.

“Sfidat, kanë qenë dhe janë, kemi vështirësi çdo herë dhe nuk mund të themi që është lehtë për të arritur një rekord ose suksese të shkëlqyera si notuesit tanë. Domethënë, ende mbetet, infrastruktura mbetet një prej sfidave kryesore që ne kemi. Na duhet një pishinë 50 metra për gara të tilla, për gara të nivelit të lartë” – vazhdoi Llalloshi.

Në fund theksoi rëndësinë e përkrahjes institucionale për zhvillimin e sportit dhe sportistëve në Kosovë.

“Përkrahja institucionale është shumë e rëndësishme për zhvillimin e sportit edhe sportistave tanë. Ministria, domethënë, i mbështet federatat me anë të buxhetit dhe thirrjeve për zhvillimin e sportit, dhe gjithashtu ligji për sponzorizim, që është shumë i fuqishëm edhe është kyç për zhvillimin e sportistave tanë” – përfundoi trajnerja.

Ndërkohë notarja Erina Idrizaj u shpreh e lumtur për suksesin e arritur dhe rekordin e thyer në garë.

“Jam ndjerë shumë mirë. Ka qenë një eksperiencë shumë e mirë, sidomos që e kam thyer rekordin shtetëror, po ashtu edhe që i kam bërë 680 pikë FINA” – tha Idrizaj.

Notarja ka përshkruar si shumë pozitive përvojën e saj në garat ndërkombëtare në Dubrovnik, duke theksuar emocionin e përfaqësimit të Kosovës.

“Për mua është një ndjesi shumë e mirë ta përfaqësoi Kosovën në gara, sidomos në gara ndërkombëtare, në këtë garën e fortë siç ka qenë gara në Dubrovnik, në Kroaci. Edhe jam ndjerë shumë mirë” – shtoi Idrizaj.

Riga Shala notarja e cila vendosi rekord të ri kombëtar në disiplinën 200m Freestyle, duke thyer rekordin që qëndronte që nga viti 2021, ka folur për pritshmëritë dhe performancën e saj në garën ndërkombëtare, duke theksuar përgatitjen e mirë dhe rezultatet e arritura.

“Pritshmëritë e mia për këtë garë kanë qenë të larta, duke e marrë parasysh punën që e kemi bërë, edhe kam ndreq kohët e mia personale në çdo disiplinë dhe kam thyer rekordin e Kosovës në 200 metra stil të lirë” – tregon Shala.

Në fund ajo tregoi për krenarinë dhe synimin e saj për të përfaqësuar sa më mirë Kosovën në gara ndërkombëtare.

“Ndihem shumë krenare që e përfaqësoj shtetin tim në një garë ndërkombëtare dhe synimi im është që me e përfaqësua në mënyrën sa më të mirë të mundshme” – përfundoi Shala.

Me 33 medalje të fituara dhe rekorde të reja kombëtare, notaret kosovare kanë treguar nivel të lartë përgatitjeje dhe përkushtimi./KosovaPress