Dogana e Kosovës ka konfiskuar një sasi të konsiderueshme mallrash të padeklaruara në Pikëkalimin Kufitar në Merdare. Bëhet fjalë për tri pako me cigare elektronike, një sasi prej 500 copë, me vlerë rreth 10 mijë euro.

Sipas njoftimit , gjatë kontrollit fillestar është paraqitur një autobus i linjës ndërkombëtare. Pas pyetjes së zyrtarëve doganorë nëse kishte mallra për deklarim, drejtuesi i automjetit ka deklaruar se nuk posedonte asgjë për të raportuar.

“ Në bashkëpunim me Policinë e Kosovës, automjeti është selektuar për kontroll të vijës së dytë dhe është dërguar në hapësirat e kontrollit të detajuar. Gjatë këtij kontrolli, në pjesën e motorit si dhe në hapësirën e tualetit, është zbuluar mall i fshehur. Janë evidentuar tri pako me cigare elektronike, në sasi prej 500 copë, me vlerë të përafërt rreth 10,000.00 euro.”-thuhet në njoftimin e Doganës.

Dogana e Kosovës ka ndërmarrë veprimet e nevojshme ligjore, duke ndaluar përkohësisht mallin deri në përfundimin e procedurave administrative.

/Kosovapress/