Deri më tani janë katër të plagosur nga të shtënat me armë zjarri që ndodhën të enjten në mesditë në sheshin “Zahir Pajaziti”, në Podujevë.

KosovaPress merr vesh se, të plagosurit janë Argjend Islami, Fidaim Zejullahu dhe Agim Xhemaji dhe Argjend Islami, rreth 25 vjeç, i cili, sipas informacioneve fillestare, ishte kalimtar i rastit në momentin kur u hap zjarri.

Drejtori i Qendrës Emergjente në QKUK, Naser Syla, tha se të lënduarit kanë plagë nga armë zjarri dhe po i nënshtrohen ekzaminimeve të nevojshme.

Zëdhënësi i policisë për Kryeqytetin, Enis Pllana ka konfirmuar më herët se rreth orës 13:30, është pranuar informata për të shtëna me armë zjarri në Podujevë.

“Policia ka dalë menjëherë në vendin e ngjarjes dhe nga informacionet e para dyshohet se tre persona janë plagosur dhe të njëjtit  janë dërguar në QKUK, për trajtimin e nevojshëm mjekësor”, tha Pllana për KosovaPress.

Pllana tha se aktualisht, njësitet policore po merren me veprimet hetimore me qëllim të sqarimit të plotë të rrethanave të ngjarjes.

/Kosovapress/