Kryetari i Komunës së Tetovës, Bilall Kasami, bën të ditur se janë përmbyllur të gjitha procedurat burokratike për realizimin e autostradës Shkup-Bllacë, duke i hapur rrugë fillimit të punimeve në këtë projekt infrastrukturor.

Përmes një postimi në rrjetet sociale, Kasami e cilësoi zhvillimin si një hap të rëndësishëm që do të afrojë edhe më shumë Shkupin me Prishtinën.

“Përfunduan të gjitha procedurat burokratike dhe u hap rruga për fillimin e punimeve në autostradën Shkup-Bllacë. Shkupi me Prishtinën sot janë më afër se kurrë”, ka shkruar ai.

Kasami theksoi se periudha e premtimeve pa rezultate ka marrë fund, ndërsa vlerësoi se shqiptarët po përjetojnë një kohë të karakterizuar nga puna, projektet dhe zhvillimi.

“Koha e demagogjisë shterpe ka mbaruar. Shqiptarët po jetojnë epokën e punës, projekteve dhe zhvillimit”, u shpreh kryetari i Tetovës.

Ai uroi qytetarët për këtë projekt, duke e konsideruar atë një arritje me rëndësi për lidhjen infrastrukturore dhe zhvillimin ekonomik të rajonit.

/Kosovapress/