Policia e Kosovës ka konfiskuar armë, municion dhe pajisje të ndryshme gjatë kontrolleve të zhvilluara në dy shtëpi të pabanuara në fshatin Potokmali të Leposaviqit.

Sipas raportit 24-orësh të Policisë, më 29 qershor, rreth orës 15:15, në njërin nga lokacionet e kontrolluara janë gjetur dhe sekuestruar një armë e gjatë, dy krehër me 20 fishekë, dy kuti me sfera metalike për armë gjuetie, si dhe një makineri për mbushjen e fishekëve të armëve të gjuetisë.

Vetëm pak minuta më vonë, rreth orës 15:30, gjatë kontrollit në një tjetër shtëpi të pabanuar në të njëjtin fshat, policia ka sekuestruar një revole me karikator dhe pesë fishekë, gjashtë krehër me gjithsej 56 fishekë, një radiolidhje me adapter, një kuti plastike me municion për armë gjuetie, 22 kapsulla, vaj për armë, një fishek për armë gjuetie, pjesë plastike me barut, një thikë dhe një këllëf për revole.

Gjatë kontrollit është gjetur edhe një xhaketë ushtarake me mbishkrimin e Serbisë.

Lidhur me të dy rastet është njoftuar prokurori kompetent, ndërsa hetimet po vazhdojnë nën dyshimin për veprën penale "Armëmbajtje pa leje".

Ky është rasti i dytë brenda pak ditësh në veri të vendit ku Policia e Kosovës zbulon armatim dhe pajisje të paligjshme. Më 22 qershor, gjatë kontrolleve në tri lokacione në Zubin Potok, ishin sekuestruar armë, municion dhe mjete të tjera ilegale.

/Kosovapress/