Kryetari i komunës së Obiliqit, Halil Thaçi është intervistuar nga Prokuroria Speciale për shpronësime në fshatin Shipitullë dhe Hade, ku siç tha ai, është intervistuar si dëshmitar.

Sipas tij, kjo është një temë e përgatitur nga rivalët e tij politik.

“Është një temë e përgatitur moti nga rivalët e mi politik, më kanë përfshi në shpronësimet në fshatin Shipitullë, jam i kënaqur që prokuroria ka filluar të merret me këtë çështje, dhe i bëj thirrje që ta hetojë deri në fund. Është e vërtetë që unë kam biseduar me qytetarë, vazhdoj të bisedoj, të ngreh çështjen e tyre. Banorët e fshatit Shipitullë dhe Hade, janë të diskriminuar dhe sigurisht që gjendja e tyre për jetë është e pamundshme atje. Andaj unë edhe sa kam qenë në kuvend dhe sot në cilësinë e kryetarit nga këtu i bëj thirrje qytetarëve se do më kenë gjithmonë gardian për mbrojtjen e te drejtave”, tha ai për media pas përfundimit të intervistimit.

Ai tha se është intervistuar nga Prokuroria si dëshmitar.

“Si dëshmitar më pyetën për çdo gjë dhe për çkado që unë di, do t’i përgjigjem prokurorit”, tha ai.

/Kosovapress/