Një sulm izraelit të enjten vrau të paktën dy palestinezë dhe plagosi pesë të tjerë lindje të qytetit të Gazës, sipas Fadel Naeem, drejtor i Spitalit Al-Ahli, ku mbërritën viktimat.

Goditjet vdekjeprurëse izraelite kanë ndërprerë vazhdimisht armëpushimin që nga hyrja në fuqi më 10 tetor.

Sipas Associated Press, rritja e viktimave palestineze ka bërë që shumë banorë në Gaza të thonë se duket sikur lufta ka vazhduar pa u ndërprerë.

Ndërkohë, ushtria izraelite njoftoi të enjten se ushtarët në jug të Gazës kanë vrarë një palestinez që kishte kaluar vijën që ndan zonën e kontrolluar nga Izraeli në shiritin e Gazës nga zona ku shumica e palestinezëve janë të grumbulluar. Të shtënat e tilla janë bërë një dukuri e zakonshme në territor që nga hyrja në fuqi e armëpushimit.

Ushtria tha se personi i vrarë ishte një militant dhe përbënte kërcënim për trupat. Ajo mban këtë pretendim për shumicën e rasteve të palestinezëve të vrarë pranë vijës, edhe pse disa civilë janë vrarë, përfshirë fëmijë të vegjël, tha një zyrtar ushtarak që foli për AP-në me kusht anonimiteti sipas rregullave ushtarake.

Të mërkurën, Komiteti për Mbrojtjen e Gazetarëve publikoi një raport duke thënë se më shumë gazetarë dhe punonjës mediatikë janë vrarë në vitin 2025 se në çdo vit tjetër që kur organizata filloi të mbledhë të dhëna mbi tridhjetë vjet më parë. Të paktën 129 gazetarë dhe punonjës mediatikë u vranë, dy të tretat e tyre nga Izraeli.

618 palestinezë janë vrarë që nga fillimi i armëpushimit, duke e sjellur numrin e të vrarëve në 72,082.

/Kosovapress/