Prokuroria Themelore në Prizren ka bërë me dije se të mërkurën ka ngritur aktakuzë ndaj të pandehurit me inicialet D.D. për aksidentin me fatalitet që ndodhi më 18 mars 2026 në rrugën “Wesley Clark” në Prizren, ku humbi jetën një këmbësor.

Sipas aktakuzës së Departamentit të Krimeve të Rënda, i dyshuari, i cili ndodhet në paraburgim që nga dita e fatkeqësisë, dyshohet se ka kryer veprën penale “Rrezikimi i trafikut publik”.

Prokuroria njofton se D.D., duke drejtuar automjetin e tij, nuk e kishte përshtatur shpejtësinë me kufizimet e parapara në atë segment rrugor, ku lejohej lëvizja deri në 40 kilometra në orë. Sipas aktakuzës, ai po lëvizte me shpejtësi prej 75 kilometra në orë pranë një shtegu për këmbësorë, afër rrethrrotullimit.

Si pasojë e shpejtësisë së lartë, i pandehuri nuk ka arritur ta vërejë me kohë këmbësorin I.O., i cili po kalonte në shtegun e këmbësorëve, duke e goditur atë dhe duke shkaktuar aksident me pasoja fatale.

Viktima ka ndërruar jetë si pasojë e lëndimeve të rënda të marra në aksident, ndërsa raporti i autopsisë ka konstatuar se vdekja erdhi si rezultat i lëndimeve të shkaktuara nga aksidenti në trafik.

Prokurori i rastit i ka propozuar gjykatës që, pas shqyrtimit gjyqësor dhe administrimit të provave, i pandehuri të shpallet fajtor dhe të dënohet sipas ligjit.

/Kosovapress/