Instituti GAP dhe Instituti Kosovar për Qeverisje Lokale (KLGI) kanë kërkuar tërheqjen e dispozitave që i konsiderojnë diskriminuese në Draft Ndryshimin dhe Plotësimin e Rregullores për Tarifa, Ngarkesa dhe Gjoba Komunale të Komunës së Prishtinës, si dhe organizimin e një procesi të veçantë konsultimi publik për këtë dokument.

Përmes një reagimi të përbashkët, dy organizatat shprehën shqetësimin se disa dispozita të draft-rregullores rrezikojnë të cenojnë parimet e barazisë, proporcionalitetit dhe arsyeshmërisë në trajtimin e qytetarëve dhe subjekteve ekonomike.

Sipas tyre, drafti parashikon vendosjen e tarifave komunale për veprimtari ekonomike pa ofruar metodologji të qartë të llogaritjes apo analizë të ndikimit ekonomik. Po ashtu, ata kundërshtojnë propozimin për vendosjen e një takse prej 10 eurosh për hyrjen në territorin e Kryeqytetit për automjetet e regjistruara jashtë Prishtinës.

“Këto masa krijojnë trajtim të pabarabartë ndërmjet kategorive të ndryshme të qytetarëve dhe bizneseve dhe rrezikojnë të cenojnë parimin e mosdiskriminimit”, thuhet në reagim.

GAP dhe KLGI rikujtojnë se Prishtina është e vetmja komunë në Kosovë që përfiton grant shtesë për shkak të statusit të Kryeqytetit, duke marrë rreth 20 milionë euro në vit nga buxheti shtetëror.

Sipas tyre, kjo mbështetje financiare synon të adresojë ngarkesën administrative dhe funksionale të Kryeqytetit, por njëkohësisht të krijojë kushte më të mira për zhvillim dhe mundësi të barabarta për qytetarët dhe bizneset.

Dy organizatat i kanë bërë thirrje Komunës së Prishtinës që të heqë dorë nga dispozitat që prodhojnë trajtim diskriminues ose përjashtues, të organizojë konsultim publik të ndarë dhe të strukturuar sipas grupeve të prekura, si dhe të sigurojë arsyetim të qartë dhe analizë të ndikimit për ndryshimet e propozuara.

Ata vlerësojnë se rregulloret komunale duhet të kontribuojnë në përmirësimin e shërbimeve dhe zhvillimin e qëndrueshëm, duke garantuar trajtim të barabartë për qytetarët dhe bizneset.

“Komuna e Prishtinës duhet ta zhvillojë këtë proces përmes konsultimeve reale dhe rregullave të drejta, në frymën e qeverisjes së hapur që i shërben kryeqytetit dhe qytetarëve”, përfundon reagimi i përbashkët i GAP-it dhe KLGI-së.

Komuna e Prishtinës bëri të ditur se për veturat e regjistruara jashtë Prishtinës vetëm për hyrje në qendër të kryeqytetit  do të jetë pagesa deri në dy euro dhe jo 10 euro për secilin qytetar që vjen me veturë në kryeqytet.

Drejtori i Zhvillimit Ekonomik dhe Inovacionit në Komunën e Prishtinës, Luftar Braha bëri të ditur dje se në këtë fazë pritet që vetëm zona qendër të ketë një taksë për hyrje të veturave që nuk janë në Prishtinë.

“Taksa keni dëgjuar edhe kryetarin do të jetë 1 euro ose 2 euro. Taksa për kamiona apo autobusa të vjetër që kur i sheh të duket sikur është termoelektrana e KEK-ut me tym në krejt qytetin për ato do të ketë taksa pothuajse ndëshkuese. Për vetura dhe njerëz do të kenë lëvizje të lirë, por thjesht për një zonë të qytetit do të taksohen”, tha drejtori i Zhvillimit Ekonomik dhe Inovacionit në Komunën e Prishtinës, Luftar Braha.

Lexo po ashtu

Komuna e Prishtinës: Vetëm për hyrje në qendër të kryeqytetit do të paguhet deri në dy euro

/Kosovapress/