Finalja e Kupës së Kosovës do të zhvillohet të enjten mbrëma në stadiumin “Fadil Vokrri” në Prishtinë, ku Ferizaji dhe Dukagjini do të përballen për të shkruar histori, duke synuar trofeun e parë në këtë garë.

Ndeshja pritet të nisë në ora 20:00 dhe vjen si kulmi i një rrugëtimi të suksesshëm për të dy skuadrat, të cilat kanë kaluar të gjitha sfidat deri në aktin përfundimtar. Interesimi për këtë përballje është i madh, ndërsa gjithçka është gati për një spektakël futbolli në kryeqytet.

FFK-ja ka bërë edhe caktimin e gjyqtarëve për këtë ndeshje të rëndësishme. Drejtësinë në finale do ta ndajë Genc Nuza si gjyqtar kryesor, i asistuar nga Fatlum Berisha dhe Bujar Selimaj, ndërsa gjyqtar i katërt do të jetë Bardh Ajeti. Në sistemin VAR do të jetë Burim Jahmurataj, ndërsa AVAR është caktuar Besnik Morina.

Para kësaj ndeshjeje, optimizmi në kampin e Ferizajit është i madh. Presidenti i klubit, Lulzim Abazi, duke folur për KosovaPress tregon rëndësinë e kësaj finaleje dhe përgatitjet e skuadrës.

“Nesër vërtet është një lojë për neve, për ferizajasit, një finale shumë e madhe. Kjo është hera e tretë si klub ferizajas që garon që nga fillimet e tij; është hera e tretë që garon, arrin në finalen e Kupës së Kosovës, ku siç dihet, dy herë të tjera ka dështuar, ndërsa nesër e kemi herën e tretë, por mendoj që do të jetë e treta dhe e vërteta. Jemi përgatitur maksimalisht, edhe pse siç e dini kemi pasur disa probleme gjatë kampionatit, mirëpo kemi punuar në atë drejtim që ekipi, grupi i lojtarëve, të jetë sa më në nivelin e duhur për nesër, për ndeshjen e mbrëmjes që do të zhvillohet në “Fadil Vokrri”, në ora 20:00.” – tha Abazi.

Abazi theksoi edhe përgjegjësinë e lojtarëve dhe përkushtimin e tyre maksimal për këtë ndeshje.

“Një obligim shtesë e kanë ndaj vetë fanellës edhe klubit për shumë arsye që nuk kemi mundur gjatë kampionatit t’i arrijmë. Janë zotuar që do ta japin maksimumin nga vetja dhe është fatmirësisht mirë; thashë që janë të gjithë komplet, mirëpo qëndrojnë edhe mirë edhe psiqikisht, por edhe fizikisht, e thashë më herët kështu që janë të përgatitur dhe mezi që po e presin nesër, pra ndeshjen me Dukagjinin.” – tregon Abazi.

Duke folur për kundërshtarin, presidenti i Ferizajt vlerësoi lart Dukagjinin, por mbetet besimplotë në suksesin e skuadrës së tij.

“Cilësia është në anën tonë dhe besoj që me cilësitë që i kemi ne do t’ia arrijmë qëllimit, mirëpo prapë se prapë po them Dukagjini ka një ekip shumë të mirë, e cila e bën një lojë të shpejtë dhe shënon gola, kështu që ne mendoj që do të jemi të kujdesshëm në atë pjesë, edhe stafi i trajnerëve është duke punuar në atë drejtim. Do të jenë shumë të kujdesshëm që të mos marrim gola, sidomos në pjesën e parë, por ne të shënojmë të parët.” – përfundon Abazi.

Ndërkohë trajneri i Ferizajt, Arsim Abazi, theksoi se e gjithë vëmendja e skuadrës është e përqendruar te finalja, duke e parë këtë ndeshje si një mundësi të artë për të siguruar daljen në garat evropiane.

“Po, ne momentalisht jemi të përqendruar në këtë ndeshje dhe e dimë se finalja e Kupës është diçka ku çdo skuadër dëshiron të jetë, sepse dihet se fituesi i Kupës siguron daljen në Evropë. Kështu që ne jemi fokusuar maksimalisht në këtë ndeshje, sidomos javën e fundit kemi qenë të përqendruar vetëm te kjo finale dhe jemi përgatitur maksimalisht. Kjo është një ndeshje historike, sidomos për klubin tonë.” – shtoi trajneri Abazi.

Tutje, kapiteni i skuadrës së Ferizajit, Betim Haxhimusa, ka folur për atmosferën brenda skuadrës dhe mbështetjen e tifozëve.

“Atmosfera është maksimalisht e mirë. Jemi të gjithë të gatshëm dhe të motivuar për këtë ndeshje dhe synojmë të shpallemi fitues. U bëj thirrje tifozëve që të vijnë sa më shumë nesër për të na përkrahur. Nuk do t’i zhgënjejmë dhe besoj se, bashkë me ta, do t’ia dalim në fund.” – tregon kapiteni Haxhimusa.

Finalja pritet të jetë një përballje e fortë dhe emocionuese, ku njëra nga skuadrat do të shkruajë historinë duke ngritur për herë të parë trofeun e Kupës së Kosovës.

KosovaPress