Një fëmijë është në mesin e të lënduarve në zjarrin që ka përfshirë kulmin e një ndërtese në rrugën “Isa Kastrati”, në Prishtinë.

Gjendja e tij është stabile ka bërë të ditur për KosovaPress, drejtori i Emergjencës së Qendrës Klinike Universitare të Kosovës, Naser Syla.

“Është trajtuar në Qendrën e Emergjencës , ende është në observim, gjendja stabile, do të transferohet në Klinikën e Kirurgjisë Plastike për vazhdim të tretmanit”, tha ai.

Ndërkaq në këtë incident, sipas drejtorit për Siguri dhe Emergjenca Lulëzim Fushtica ka mbetur i lënduar edhe një banor tjetër, si dhe pesë zjarrfikës kanë marrë lëndime të lehta gjatë intervenimeve në shuarjen e zjarrit.

Sipas Policisë së Kosovës, incidenti ka ndodhur rreth orës 07:30 të mëngjesit ku pas pranimit të informatës në vendin e ngjarjes kanë dalë njësitet policore, ekipet e zjarrfikësve dhe ekipet mjekësore.

Në vendin e ngjarjes ishin edhe ekipe të zjarrfikësve të Lipjanit, si dhe më vonë ka arritur edhe Kompania Rajonale e Ujësjellësit “Prishtina”, për t’iu dalë në ndihmë zjarrfikësve me furnizim me ujë.

/Kosovapress/