Kryetari i Këshillit Organizativ të festimit të ditëlindjes së 621-vjetorit të Kryeheroit tonë Kombëtar, Gjergj Kastrioti – Skënderbeu, Basri Beka, i ka falënderuar të gjithë ata që në çfarëdo forme u bënë pjesë e këtij manifestimi.
“Falënderoj secilin qytetar, sponsor, artist, aktivist, veteran, bashkëpunëtor dhe çdo shqiptar që është bërë pjesë e këtij organizimi dhe ka kontribuar në suksesin e tij”, shkroi Beka, një ditë pas shënimit të kësaj date me aktivitete të ndryshme nga Organizata “Shqiptaria” së bashku me mbështetësit dhe bashkëpunëtorët e saj.
Duke pohuar se të qenit në krye të organizimeve në nderim të Gjergjit të Madh ka qenë dhe mbetet një privilegj i veçantë, por edhe një përgjegjësi e madhe kombëtare e morale, ai shfaqi shpresën që me përkushtimin të ketë përmbushur detyrimet dhe besimin që i është dhënë në këtë rrugëtim, “duke kontribuar që kjo ngjarje tashmë tradicionale të ruajë madhështinë, dinjitetin dhe frymën kombëtare që meriton figura e Skënderbeut”.
“Lavdi e përjetshme Gjergj Kastriotit – Skënderbeut!”, e përfundoi Beka postimin e tij.