19:30

Janë identifikuar dy të rinjtë që humbën jetën tragjikisht pasditen e kësaj të mërkurë në zonën e Ranës së Hedhur në Shëngjin të Shqipërisë. Viktimat janë Leonid Alia nga Fushë Kosova dhe Jetmir Çopa nga Prishtina, shkruan Euronews Albania, përcjell KosovaPress.

Mësohet se 5 të rinj u morën nga dallgët pasi u futën për t’u larë. Pasditja e tyre në bregdetin e Shëngjinit rezultoi fatale prej dy prej tyre të cilët humbën jetën. Mësohet se dy të rinjtë e tjerë janë nxjerrë nga uji dhe janë në gjendje të rëndë në spital.

Në vendngjarje kanë ndërhyrë forcat e kërkim-shpëtimit dhe Policia e Shtetit, të cilat po punojnë për sqarimin e plotë të rrethanave të ngjarjes dhe dokumentimin e saj.

18:45

Begaj konfirmon se dy të rinj nga Kosova humbën jetën në Shëngjin

Presidenti i Shqipërisë, Bajram Begaj, ka shprehur ngushëllimet për familjet e dy të rinjve nga Kosova që humbën jetën tragjikisht sot në Shëngjin.

Përmes një reagimi publik, Begaj tha se e ka marrë me hidhërim të thellë lajmin për ngjarjen e rëndë, ndërsa uroi shërim të shpejtë për tre të rinjtë e tjerë të lënduar.

“Me hidhërim të thellë mësova për ngjarjen tragjike që u mori jetën dy të rinjve nga Kosova sot në Shëngjin. Në këto çaste të vështira, shpreh ngushëllimet më të sinqerta për familjet dhe të afërmit e viktimave, ndërsa uroj shërim sa më të shpejtë për tre shokët e tyre”, ka deklaruar Begaj.

Presidenti shqiptar theksoi se kjo tragjedi rikujton rëndësinë e kujdesit dhe respektimit të masave të sigurisë në plazhe.

Ai u bëri thirrje institucioneve qendrore dhe vendore, si dhe operatorëve turistikë, të ndërmarrin të gjitha masat e nevojshme për garantimin e sigurisë në plazhe gjatë sezonit veror.

Sipas Begajt, qëllimi është parandalimi i ngjarjeve të ngjashme dhe mbrojtja e jetës së qytetarëve dhe vizitorëve.

17:45

Tragjedia në Shëngjin, ndërrojnë jetë dy të rinj pasi u morën nga dallgët - dyshohet se janë kosovarë

Një ngjarje e rëndë dyshohet të ketë ndodhur në bregdetin e Shëngjinit, ku katër shokë nga Kosova që kishin hyrë në det janë përballur me dallgët e forta.

Siç raporton Top Channel, dyshohet se të rinjtë janë marrë nga rrymat dhe dallgët e detit, ndërsa dy prej tyre kanë humbur jetën dhe dy raportohet se janë në gjendje të rëndë.

Ende nuk ka një konfirmim zyrtar nga autoritetet lidhur me rrethanat e ngjarjes dhe gjendjen e personave të tjerë.

17:26

E rëndë në Shëngjin, katër të rinj i marrin dallgët e forta - Dyshohet për viktima

Një ngjarje e rëndë dyshohet të ketë ndodhur në bregdetin e Shëngjinit, në Shqipëri, ku katër të rinj, të cilët kishin hyrë në det, janë përballur me dallgë dhe rryma të forta detare.

Sipas informacioneve paraprake, dyshohet se të rinjtë janë tërhequr nga rrymat e detit, ndërsa për një prej tyre raportohet se mund të ketë humbur jetën. Deri më tani, nuk ka një konfirmim zyrtar nga autoritetet për rrethanat e plota të ngjarjes apo gjendjen e tre personave të tjerë, shkruan Euronews Albania, përcjell KosovaPress.

Në zonë pritet ndërhyrja e forcave të kërkim-shpëtimit dhe e Policisë së Shtetit, me qëllim sqarimin e plotë të situatës dhe gjetjen e personave të përfshirë.

Hetimet dhe verifikimet vijojnë, ndërsa autoritetet pritet të dalin me informacion zyrtar në orët në vijim.

Lajmi në zhvillim...