Daja: Dinamo, rivali më i vështirë që ka pasur Ballkani
Trajneri i Ballkanit, Ilir Daja, e ka cilësuar Dinamo Zagrebin si kundërshtarin më të vështirë për skuadrën e tij deri më tani në garat evropiane.
Ai ka thënë se përkundër cilësive të mëdha që ka rivali i ndeshjes së nesërme, Ballkani nuk e ka ndërmend të ndryshojë stil të lojës, por që përtej respektit për ta, respektojnë edhe veten dhe viti i dytë radhazi në garat evropiane tregon që Ballkani është skuadër që duhet respektuar.
Sa i përket synimit për të kaluar në fazën e eliminimit direkt të Ligës së Konferencës, Daja ka theksuar se lojtarët e tij duhet të qëndrojnë me këmbë në tokë dhe të shohin ndeshje pas ndeshje brenda mundësive të skuadrës, duke shtuar se skuadra ka humbur pak në aspektin e cilësisë me largimin e Rrahmanit dhe Korenicës.
Në konferencë për media, Daja ka folur edhe për ftesën që mesfushori Edvon Kuç ka marrë nga Mali i Zi duke e cilësuar si lajm të mirë për kampionin e Kosovës sepse tregon nivelin e lartë të kualitetit që ka kjo skuadër.
Ndërsa mesfushori Qëndrim Zyba theksoi se ndihet jashtëzakonisht i lumtur me mënyrën se si po e përfaqëson skuadra futbollin kosovar në Evropë, si dhe për faktin se rivalët evropian tashmë po gëzojnë respekt të madh për Ballkanin.
