Një grua që ka lënë gjurmë në historinë e Kosovës, duke u angazhuar parreshtur për paqe e barazi. Fuqzimi i gruas është prioritet i saj, dhe kauzën për gra të forta ekonomikisht synon ta çojë përpara si deputete e Kuvendit të Kosovës. Kjo është Valdete Idrizi - një aktiviste e shquar e cila po garon me listën e Partisë Demokratike të Kosovës në zgjedhjet e 9 shkurtit. Emri i saj njihet që prej viteve 1990, me angazhimin e saj në kauza të rëndësishme. Ajo ishte pjesë aktive e lëvizjes studentore kundër regjimit të atëhershëm të Millosheviqit. Tani në paqe, Idrizi ka në fokus zhvillimin e grave dhe vajzave. Në kuadër të programit të PDK-së, “Kosova mundet ma mirë”, Idrizi thotë se, ndër të tjera, është paraparë platforma për gratë që parasheh lehtësira në biznese, në studime por edhe për nënat lehona. "Janë disa kauza jetësore që tërë jetën jam marrë me to, janë gratë – gjysma e popullatës. Vajzat dhe gratë janë faktikisht në gjithë pesë prioritetet e programit ‘Kosova mundet ma mirë’, janë gratë e përfshira indirekt por është edhe program i veçantë për fuqizimin e grave dhe vajzave me të cilin do të merremi sepse kam qenë edhe bashkë në hartimin e programit. Nuk mund të flasim asnjëherë për fuqizim ekonomik të grave pa i fuqizuar ekonomikisht ato. Edhe në shëndetësi, edhe në arsim, edhe në ekonomi. Por duke qenë se edhe jam prej Mitrovicës edhe gjithë jetën kam jetuar në Mitrovicë natyrisht që do të jem edhe zë i qytetarëve të Mitrovicës dhe kërkesave të tjera sidomos mirëqenia e qytetarëve”, deklaron ajo. Përveç rritjes së përfaqësimit të grave në politikë dhe barazisë në vendimmarrje, Idrizi thekson se janë paraparë disa lehtësira për fuqizimin ekonomik të tyre.  “Janë programet, lehtësirat tatimore, reformat fiskale, që do të bëhen komplet në zhvillimin e qëndrueshëm ekonomik por tek bizneset që edhe udhëhiqen prej grave do të ketë mundësi të përkrahjes përmes subvencioneve edhe granteve. Deri në 10 mijë euro që kanë qarkullim nuk do të tatohen, do të jetë shumë më lehtë që të fillojnë biznesin, e nëse duan ta zgjerojnë pas një kohe, 30 për qind do të marrin prej shtetit subvencion që të mund të rritet. Tjetra, do të jetë rritja e pagave, ne po flasim për 84 mijë qytetarë, gra dhe burra, që marrin pagën përmes fondeve të shtetit, do të iu rritet paga për 50 për qind. Kjo mënyrë direkte ndihmon natyrisht edhe gruan sepse pastaj është fondi i papunësisë që nëse një grua apo vajzë apo burrë dhe djalë, nëse e humb punën në sektor privat, atëherë do të jetë një fond i qëndrueshëm i shtetit, ku 80 për qind të pagës do ta marrë për gjashtë muaj”, shton Idrizi. Në platformën për gratë, ndër tjera, është paraparë subvencionimi prej 100 euro për secilin fëmijë që dërgohet në çerdhe private. Kandidatja për deputete nga radhët e PDK-së, Valdete Idrizi flet edhe për dhunën ndaj grave dhe nevojën për përmirësim të legjislacionit për të siguruar mbrojtjen e tyre si dhe ndëshkimin e dhunës. “Të fuqizohen strehimoret edhe mos të bëhen në një far forme sikur ‘lypse’, fatkeqësisht siç ka ndodhur. Po t’u mundësohen kushtet që ta trajtojnë viktimën dhe të mos traumatizohen dy herë, por për të ua lehtësuar. Edhe në tjetrën anë, të punohet edhe me drejtësi që gjithë ata dhunuesit të mos lëshohen në procedurë të rregullt, por të jenë masat e nevojshme. Kjo i bie që duhet të ketë amendamentin të disa ligjeve”, thotë ajo.Kandidatja për deputete, Valdete Idrizi thotë se do të jetë zë edhe i qytetarëve të Mitrovicës, komunës prej nga ajo vjen. Me numrin 36, ajo kërkon besimin e qytetarëve në zgjedhjet e 9 shkurtit, për çka premton se do të jetë “dorë e zgjatur” dhe bashkëpunëtore e madhe e tyre. Ajo beson në mbështetjen e qytetarëve, bazuar edhe në punën e saj si deputete e legjislaturës së shtatë të Kuvendit të Kosovës. “E dinë [qytetarët] që do të jem një dorë e zgjatur dhe do të bashkëpunojmë dhe ashtu mundemi t’i sjellim të mira këtij shtetit tonë. Fola ngushtë për Mitrovicën sepse kam punuar në Mitrovicë, por unë duke qenë edhe si drejtoreshë e platformës CiviKos për shumë vite kam njohur edhe telashet edhe potencialet në komunat e tjera, kështu që do të jem një bashkëpunuese e madhe”, përfundon ajo. Idrizi u angazhua edhe për ndërtimin e paqes dhe bashkëjetesës. Në vitin 2001, ajo themeloi organizatën “Community Building Mitrovica” (CBM), një platformë që për më shumë se dy dekada ka shërbyer si urë lidhëse në mes të komuniteteve të ndara të Mitrovicës. Ajo drejtoi CBM për 10 vjet, duke nisur shumë projekte inovative. Idrizi ishte edhe bashkëthemeluese e Shkollës së Rokut në Mitrovicë - një iniciativë për afrimin e të rinjve përmes muzikës, dhe themeluese e një qendre për gra, ku janë fuqizuar dhjetëra gra dhe vajza. Për më shumë se pesë vjet, ajo drejtoi edhe Platformën CiviKos - rrjetin më të madh të organizatave të shoqërisë civile në Kosovë, i cili përfshin mbi 200 organizata. Autore e shumë cmimeve prestigjioze për punën e saj shumëvjeçare, ndër të cilët edhe “International Woman of Courage” nga Departamenti amerikan i Shtetit duke u bërë gruaja e parë shqiptare që e merr këtë çmim. Idrizi është nderuar edhe me Soroptimist International Peace Prize në Amsterdam dhe WIFTS Peace Aëard në Londër - një çmim që ia dedikoi viktimave të dhunës seksuale gjatë luftës në Kosovë. Artikull i sponsorizuar