Kandidati për deputet nga Lëvizja Vetëvendosje, Jeton Mehmeti, ka deklaruar se një nga problemet kryesore me të cilat po përballen ndërmarrjet e vogla dhe të mesme në Kosovë është vonesa e pagesave nga bizneset e mëdha.
Ai bëri të ditur se Projektligji për Pagesat e Vonuara në Transaksionet Tregtare tashmë është gati dhe synon të vendosë më shumë rregull dhe disiplinë financiare në treg.
Sipas Mehmetit, ky projektligj do të krijojë rregulla më të qarta dhe mbrojtje më të madhe për bizneset e vogla dhe të mesme, në mënyrë që puna dhe produktet e tyre të paguhen me kohë.
“Mbështetja për prodhuesit dhe bizneset vendore është konkrete, e drejtë dhe e matshme”, ka theksuar Mehmeti.
Ai shtoi se forcimi i sigurisë financiare për bizneset vendore mbetet një nga prioritetet kryesore për zhvillimin ekonomik dhe krijimin e një ambienti më të favorshëm për ndërmarrësit.
